ඉරානය සමග පවතින යුද්ධය අවසන් කිරීම සඳහා එකඟතාවකට පැමිණිය හැකි බවට ට්රම්ප් පරිපාලනය විශ්වාසය පළ කළ අතර, ටෙහෙරානය දිගින් දිගටම දරුණු වුවහොත් එරටට එරෙහි ආර්ථික පීඩනය තවදුරටත් දැඩි කරන බවට ද අනතුරු අඟවා තිබෙනවා.
පසුගිය පෙබරවාරි මස අගභාගයේදී ඊශ්රායලය සමග එක්ව තමන් ආරම්භ කළ යුද්ධය බොහෝ දුරට අවසන් වෙමින් පවතින බව ජනාධිපති ඩොනල්ඩ් ට්රම්ප් ප්රකාශ කළා.
එහෙත් ඔහු විසින් ප්රකාශයට පත් කරන ලද නාවික අවහිර කිරීම් ක්රියාත්මක වීමත් සමග හෝමුස් සමුද්ර සන්ධිය හරහා සිදුවන ගමනාගමනය සාමාන්ය මට්ටමට වඩා බෙහෙවින් අඩු මට්ටමක පවතිනවා.
නැවත සාකච්ඡා ආරම්භ වීමට පෙර බලපෑමක් ඇති කිරීමේ උත්සාහයක් ලෙස, ඉරාන තෙල් ගැනුම්කරුවන්ට එරෙහිව ද්විතීයික සම්බාධක පැනවිය හැකි බවට එක්සත් ජනපදය අනතුරු අඟවා තිබෙනවා.
මෙය සිදුවන්නේ වොෂින්ටනය විසින් ඉරාන බලශක්ති සම්බාධක බලාත්මක කිරීම ලිහිල් කර සති කිහිපයකට පසුවයි.
පසුගිය ඉරිදා පැවති සාකච්ඡා කිසිදු එකඟතාවකින් තොරව අවසන් වීමෙන් පසු, ලබන සති අන්තයවන විට වැඩිදුර සාකච්ඡා සඳහා යළිත් පාකිස්තානය වෙත යාමට අමෙරිකානු සහ ඉරාන නිලධාරීන් සලකා බලමින් සිටිනවා.
මෙම ගැටුම යළි ඇවිලීම වැළැක්වීම සඳහා මධ්යස්ථ පාර්ශ්වයක් ලෙස කටයුතු කරන පාකිස්තාන හමුදා ප්රධානියා ටෙහෙරානයට පැමිණියා.
ෆීල්ඩ් මාර්ෂල් අසීම් මුනීර් ටෙහෙරානයට පැමිණි බව පාකිස්තාන හමුදාව තහවුරු කර තිබෙනවා.
පසුගිය වටයේ සාකච්ඡා සඳහා මැදිහත් වූ මුනීර්, දෙපාර්ශවය අතර පවතින මතභේද අවම කිරීමට උත්සාහ කරනු ඇති බව ඉරාන ජ්යෙෂ්ඨ ආරංචි මාර්ගයක් රොයිටර් පුවත් සේවයට පවසා ඇති බව සඳහන්.
විදේශ අමාත්ය අබ්බාස් අරක්චි X පණිවුඩයක් නිකුත් කරමින් මුනීර් පිළිගත් අතර, ඉරානය “කලාපයේ සාමය සහ ස්ථාවරත්වය ප්රවර්ධනය කිරීමට කැපවී සිටින” බව ප්රකාශ කර තිබෙනවා.
පෙබරවාරි 28 වන දින ට්රම්ප් සහ ඊශ්රායලය එක්ව ආරම්භ කළ මෙම යුද්ධය අවසන් කිරීමට පසුගිය සති අන්තයේ පැවති සාකච්ඡාවලදී එකඟතාවක් ඇති කර ගැනීමට නොහැකි වූවා.
මෙම යුද්ධය හේතුවෙන් ඉරානය සිය අසල්වැසි ගල්ෆ් කලාපීය රටවලට ප්රහාර එල්ල කිරීමටත්, ඊශ්රායලය සහ ඉරානයේ සහාය ලබන ලෙබනනයේ හිස්බුල්ලා සංවිධානය අතර ගැටුම් යළි ඇති වීමටත් හේතු වුණා.
රොයිටර්ස්
