පොලිස් මත්ද්රව්ය කාර්යාංශයේ වැටලීම් අංශයේ හිටපු ස්ථානාධිපති ප්රධාන පොලිස් පරීක්ෂක නියෝමාල් රංගජීව මහතා ඝාතන සැලසුම ඇතුළු මිනිස් ඝාතන සහ අපරාධ රැසකට සම්බන්ධ ලොකු පැටී නමැති පාතාල අපරාධකරු යුද හමුදාවේ විශේෂ බළකායෙන් පළාවිත් සිටින සෙබළුන්ගෙන් සැඳුම්ලත් කණ්ඩායමක් සකස් කරමින් සිටින බව අපරාධ පරීක්ෂණ දෙපාර්තමේන්තුව විසින් හෙළි කරගෙන තිබේ.
අතුරුගිරිය ටැටූ මධ්යස්ථානයකදී 2024 වසරේ ජූලි 08 දා ක්ලබ් වසන්ත ඇතුළු දෙදෙනෙක් ඝාතනය කරමින් එල්ලවූ වෙඩි ප්රහාරය විදේශයක සිට මෙහෙයවනු ලැබුවන් අතර ද ලොකු පැටීගේ නම කියැවිණි.
මාකඳුරේ මධුෂ්ගේ ගෝලයෙක්ව සිටි ඔහු ප්රධාන පොලිස් පරීක්ෂක රංගජීව ඝාතන සැලසුමට සම්බන්ධ වන්නේ එකළ මධුෂ් ඩුබායි සිට ලබාදුන් කොන්ත්රාත්තුවකට අනුවය.
ශ්රී ලංකා යුද හමුදාවේ 07 වැනි පාබල රෙජිමේන්තුවේ වසර 02ක පමණ කාලයක් සේවය කර සිටි ඔහු පාතාලයේ අපරාධකරුවෙක් ලෙස කුප්රකට වන්නේ රංගජීව මහතාට පිළියන්දල දී 2017 වසරේ මැයි 09 වෙනිදා එල්ල කළ වෙඩි ප්රහාරයත් සමගිනි. වෙඩික්කරු වූ ආමි අසිත රැගෙන පිළියන්දල යතුරුපැදිය පැදවූවා යැයි හෙළිවන්නේ ලොකු පැටීය. ඔහුට සහෝදරයෙක්ද සිටින අතර ඔහු පොඩි පැටීය. ඔහුද මත්කුඩු ජාවාරමට සම්බන්ධ පාතාල අපරාධකරුවෙකි.
රංගජීව මහතාට වෙඩි තබා ඝාතනය කිරීමට තැත් කිරීම සම්බන්ධයෙන් මැදිරිගිරියේදී අත්අඩංගුවටගත් ලොකු පැටී කාලයක්ම බන්ධනාගාර ගතව සිටියේය.
ඇප මත නිදහස ලැබීමෙන් අනතුරුව හොර පාරෙන් රටින් පැනගත් ඔහු ඉන්දියාව, ඩුබායි ඇතුළු රටවල් ගණනාවක රැඳී සිටිමින් මහා පරිමාණයෙන් මත්කුඩු ජාවාරමේ නිරත වෙමින් මෙරට අපරාධ මෙහෙයවා තිබුණි.
ක්ලබ් වසන්ත ඝාතනය වන විට ඔහු රැඳී සිට ඇත්තේ බෙලරූස් රාජ්යයේය. ජාත්යන්තර පොලිසිය මගින් නිකුත්කර තිබුණු රතු වරෙන්තුවක් හේතුවෙන් එරට ආරක්ෂක අංශ අත්අඩංගුවට පත්වූ ලොකු පැටී මෙරටට රැගෙන එන්නේ පසුගිය වසරේ මැයි 04 වැනිදාය. මාස 03කට ආසන්න කාලයක් රැඳවුම් නියෝග මත බස්නාහිර පළාත් දකුණු දිසා අපරාධ කොට්ඨාසයේ රඳවා සිටි ලොකු පැටී පසුව අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාරගත කරනු ලැබීය.
අධි ආරක්ෂිත බන්ධනාගාරයක් බව සඳහන් බූස්ස බන්ධනාගාරයේ රඳවා සිටින ඔහු ජංගම දුරකථන නිදහසේ භාවිත කරමින් මත්කුඩු ජාවාරමත් සිය අපරාධ ජාලයත් මෙහෙයවමින් සිටින බව අපරාධ පරීක්ෂණ දෙපාර්තමේන්තුව විසින් හෙළිකරගෙන තිබේ. ඒ බව හෙළිවී ඇත්තේ ලොකු පැටී මත්කුඩු ජාවාරමෙන් උපයාගත් කළු සල්ලි සුදු කිරීම සම්බන්ධයෙන් පසුගිය ඔක්තෝබර් 16 දා අත්අඩංගුවට ගත් ගන්දර කපුවා සම්බන්ධයෙන් කරනු ලබන විමර්ශනවලිනි. ගන්දර කපුවාගේ බැංකු ගිණුම්වල රුපියල් කෝටි 33ක මුදලක් හුවමාරුවී ඇති බවත් එම මුදල් ලොකු පැටීගේ මත්කුඩු ජාවාරමට සම්බන්ධ මුදල් බවත් අපරාධ පරික්ෂණ දෙපාර්තමේන්තුව විසින් හෙළිකරගෙන තිබුණි.
කපුවාගෙන් හෙළිවූ තොරතුරු මත කෙරුණු වැඩිදුර විමර්ශනයේදී ලොකු පැටීගේ මත්කුඩු බෙදා හැරීමේ ජාලයේ ප්රධානියා අත්අඩංගුවට ගැනීමට අපරාධ පරීක්ෂණ දෙපාර්තමේන්තුව සමත්ව ඇත. විශේෂ බලකායේ හිටපු සෙබලෙක් වන ඔහු ප්රශ්න කිරීම් හමුවේ පවසා ඇත්තේ වළට වැටුණු තමාට දැන් ආපසු හැරෙන්නට කිසිදු ඉඩක් නොමැති බවය.
“ මට ගැලවීමක් නැහැ. ගැලවෙන්න කැමැති උනත් ඊට ඉඩක් නැහැ. මාව මරල දායි. “ යැයි ද ප්රශ්න කිරීම්වලදී ඔහු පවසා ඇති බව සඳහන්ය.
තමාගේ දරුවන් ජාත්යන්තර පාසලකට යැවීමටත් දරුවන්ට සහ බිරියට සැපවත් ජීවිතයක් ලබාදුන්නත් තමා ජීවත්වන්නේ ඒ අය ගැන මෙන්ම තමාගේ ජීවිතය ගැන බියකින් බව ද ඔහු පවසා ඇත. කොයි මෙහොතේ වෙඩි උණ්ඩයකට බිලිවේවිදැයි නොදැන බියෙන් සිටින බව ද ඔහු පවසා තිබේ.
ලොකු පැටී විසින් විශේෂ බලකායෙන් පළාවිත් සිටින සෙබළුන් රැස්කරමින් සිටින බවට තොරතුරු හෙළිවී ඇත්තේද මෙම සැකකරුගෙන් කළ ප්රශ්න කිරීම් හමුවේදී බව සඳහන්ය. තමා විසින් දන්නා කියන හිටපු සෙබළු පහලොස් දෙෙනක් පමණ ලොකු පැටීට සම්බන්ධකර දුන් බව ද ප්රශ්න කිරීම් හමුවේ ඔහු පවසා ඇති බව ආරංචි මාර්ග සඳහන් කළේය.
ගයාන් කුමාර වීරසිංහ
