පවතින වැසි සහිත කාලගුණ තත්ත්වයේ සැලකිය යුතු අඩුවීමක් හෙට (30) සිට අපේක්ෂා කරන බව කාලගුණ විද්‍යා දෙපාර්තමේන්තුව පවසනවා.
“දිට්වා” සුළි කුණාටුව ඊයේ රාත්‍රි 11.30 වන විට ත්‍රිකුණාමලය සිට 70 km ක් වයඹ දෙසින් කේන්ද්‍රගතව තිබුණු අතර, මෙම පද්ධතිය උතුරට බරව, වයඹ දෙසට ගමන් කර, නොවැම්බර් 30 වන විට ඉන්දියාවේ තමිල්නාඩු වෙරළ තීරයට ලඟා වනු ඇතැයි අපේක්ෂා කෙරෙනවා.
අද (29) දිනයේ උතුරු, උතුරු-මැද, මධ්‍යම සහ වයඹ පළාත්වල නිරන්තර වැසි හෝ ගිගුරුම් සහිත වැසි ඇති වන බවත්, ඇතැම් ස්ථානවලට මි.මී. 100 කට වැඩි තද වැසි ඇති විය හැකි බවයි පැවසෙන්නේ.
සබරගමුව සහ බස්නාහිර පළාත්වලත්, ගාල්ල සහ මාතර දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇති වන අතර, සබරගමුව සහ බස්නාහිර පළාත්වල ඇතැම් ස්ථානවලට මි.මී. 50 ට වැඩි තරමක තද වැසි ඇති විය හැකියි.
දිවයිනේ බොහෝ ප්‍රදේශවල හමන පැ.කි.මී. 60-70 දක්වා වන ඉතා තද සුළං සමඟ විටින් විට හමන පැ.කි.මී. 80-90 දක්වා වන ප්‍රහාරාත්මක සුළං ඇතිවිය හැකි අතර, තද වැසි සහ තද සුළං මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස කාලගුණ විද්‍යා දෙපාර්තමේන්තුව ජනතාවගෙන් කාරුණිකව ඉල්ලා සිටිනවා.
