දින දෙකක් පුරා පැවැති ශිෂ්‍ය විරෝධතා සහ ප්‍රචණ්ඩ ක්‍රියාවලින් පසු නේපාලයේ පාලනය සියතට ගත් බව එරට යුද හමුදාව නිවේදනය කර ඇතැයි විදෙස් මාධ්‍ය වාර්තා කරයි. විරෝධතා සහ ප්‍රචණ්ඩ ක්‍රියා අතරතුර පුද්ගලයන් 22 දෙනකු ඝාතනයට ලක්වීමත්, විරෝධතාකරුවන් විසින් රජයේ ආයතන සහ මැති ඇමැතිවරුන්ගේ නිවාස සහ දේපළ විනාශ කිරීමත්, රට අරාජිකත්වයට පත්වීම වැළැක්වීමටත් එම පියවර ගත් බව නේපාල යුදහමුදාපතිවරයා වැඩිදුරටත් නිවේදනනය කර ඇතැයි විදෙස් මාධ්‍ය සඳහන් කරයි. කත්මණ්ඩු නගරය යථා තත්ත්වයට පත් කිරීමට සහ සාමය පවත්වාගෙන යෑමේ අරමුණින් සියලු ප්‍රදේශ ආවරණය වන පරිදි හමුදාව යොදවා ඇති අතර, රට පුරා ඇඳිරිනීතිය පැනවීමට ද පියවර ගෙන ඇතැයි විදෙස් මාධ්‍ය වැඩිදුරටත් වාර්තා කරයි.
මේ අතර අගමැතිවරයා ඇතුළු කැබිනට් ඇමැතිවරු රැසක්ම ඉල්ලා අස්වීම හේතුවෙන් අන්තර්කාලීන රජයක් පිහිටුවීමට පියවර ගත යුතු බව විරෝධතාව මෙහෙය වූ Generation Z තරුණ කණ්ඩායමේ නියෝජිතයන් ඊයේ ආරක්ෂක අංශ ප්‍රධානින් සමඟ පැවැති සාකච්ඡාවේද ප්‍රකාශ කර ඇතැයි ද වාර්තා වේ. මැතිවරණයක් පවත්වනතුරු එරට හිටපු ශ්‍රේෂ්ඨාධිකරණ විනිසුරුවරයකු හෝ හිටපු අගවිනිසුරුවරයකු පත් කළ යුතු බවට තරුණ කණ්ඩායමේ නියෝජිතයන් සඳහන් කර ඇතැයි ද වාර්තා වේ. ඒ සඳහා තරුණ කණ්ඩායමේ නියෝජිතයන් විසින් හිටපු ප්‍රධාන විනිසුරු සුෂිලා කාර්කිගේ නම යෝජනා කර ඇතැයි ද වාර්තා වේ.
ප්‍රචණ්ඩ ක්‍රියා වහාම නවත්වන ලෙස යුද හමුදාපතිවරයා තරුණ කණ්ඩායමෙන් ඉල්ලීමක් කර ඇතැයිද, විරෝධතා අතරතුර තරුණයන් විසින් අවිආයුධ සහ අත් බෝම්බ හෝ වෙනත් හමුදා උපකරණ අත්පත් කරගෙන තිබේනම් ඒවා වහාම භාරදෙන ලෙස මහජනතාවට නියෝග කරමින් නේපාල හමුදාව ඊයේ නිවේදනයක් ද නිකුත් කර තිබේ. එවැනි නීතිවිරෝධී ආයුධ ළඟ තබා ගන්නා ඕනෑම පුද්ගලයකුට එරෙහිව පියවර ගන්නා බවට ද හමුදාව අනතුරු අඟවා ඇතැයි වාර්තා වේ.
විරෝධතාකරුවන් ඝාතනය කිරීම සම්බන්ධයෙන් පූර්ණ පරීක්ෂණයක් සිදු කරන ලෙස එක්සත් ජාතීන්ගේ මානව හිමිකම් මහකොමසාරිස්වරයා ද ඉල්ලීමක් කර ඇතැයි ද විදෙස් මාධ්‍ය සඳහන් කරයි. නේපාලයේ සිවිල් ගුවන් සේවා අධිකාරිය සහ ආරක්ෂක ප්‍රධානින් අතර පැවැති සාකච්ඡාවකින් පසු කත්මණ්ඩු නුවර ජාත්‍යන්තර ගුවන්තොටුපොළ නැවත විවෘත කිරීමට පියවර ගෙන තිබේ.
