පාර්ලිමේන්තු මන්ත්‍රී චාමර සම්පත් දසනායකට එරෙහිව අල්ලස් කොමිසම ගොනු කළ පැමිණිලි දෙකක් ජනවාරි 23 වැනිදා යළි කැඳවීමට කොළඹ ප්‍රධාන මහේස්ත්‍රාත් අසංක එස්. බෝදරගම නියෝග කර තිබෙනවා.
ඒ අනුව, අදාළ නඩුව අද (29) කැඳවූ අවස්ථාවේදී ඇප මත සිටින චාමර සම්පත් දසනායක අධිකරණය හමුවේ පෙනී සිටි අතර, නඩුව කැඳවූ අවස්ථාවේදී අල්ලස් කොමිසම කරුණු දක්වමින් කියා සිටියේ නඩුවේ ලේඛන සම්බන්ධයෙන් වන රස පරීක්ෂක වාර්තා තවමත් ලැබී නොමැති බවයි.
ඒ අනුව, ලේඛන වාර්තා කැඳවීමට සිහි කැඳවීමක් යොමු කරන ලෙස ප්‍රධාන මහේස්ත්‍රාත්වරයා නියෝග කළ අතර, නඩු විභාගය ජනවාරි 23 තෙක් කල් තබා තිබෙනවා.
චාමර සම්පත් දසනායක ඌව පළාත් සභාවේ ප්‍රධාන අමාත්‍යවරයා ලෙස සිටියදී, පළාතේ ළදරු පාසල් දරුවන් සඳහා බෑගයක් ලබා දීමට බැංකුවකින් අනුග්‍රාහකත්වයක් ඉල්ලා ඇති බවත්, එම අනුග්‍රාහකත්වය ලබා නොදීමේ හේතුව මත ද්වේශ සහගතව ගිණුම් 06 ක් ඉවත් කරගෙන, අල්ලස් පනතේ 70 වැනි වගන්තිය යටතට ගැනෙන දූෂණය නම් වරද සිදු කිරීම සම්බන්ධයෙන් ඔහුට චෝදනා එල්ල වී තිබෙනවා.
