ගම්පහ දිස්ත්‍රික්කයේ රෝහල් වැඩිදියුණු වෙමින් අංශ ගණනාවක්ම වැඩි වී ඇති බැවින් රෝහල් කටයුතු නිසියාකාරයෙන් පවත්වාගෙන යාම පිණිස කාර්ය මණ්ඩලය වැඩි විය යුතු බවත්, දිවයිනෙහි වැඩිම ජනගහනයක් ගම්පහ දිස්ත්‍රික්කයේ වෙසෙන නිසා මෙම දිස්ත්‍රික්කයට සෞඛ්‍ය පහසුකම් වැඩි කිරීමට විශේෂ අවධානයක් යොමුවිය යුතු බවත් දිස්ත්‍රික් සම්බන්ධීකරණ කමිටුවේදී අනාවරණය විය. දිස්ත්‍රික් සම්බන්ධීකරණ කමිටු සභාපති, නියෝජ්‍ය අමාත්‍ය මහින්ද ජයසිංහ සහ ආණ්ඩුකාර හනී යූෂුප් යන මහත්වරුන්ගේ ප්‍රධානත්වයෙන් කමිටු රැස්වීම පැවති අවස්ථාවේදී මේ බව අනාවරණය කෙරිණි.
ගම්පහ දිස්ත්‍රික්කයේ රෝහල් සඳහා අනුමත කාර්ය මණ්ඩලයට අනුව වෛද්‍ය, හෙද, මහජන සෞඛ්‍ය පරීක්ෂක, පවුල් සෞඛ්‍ය නිලධාරින් ඇතුළු අංශ ගණනාවක 390 දෙනකුගේ හිඟයක් පවතින බවත් මෙහිදී ප්‍රකාශ විය.
පළාත් සෞඛ්‍ය සේවා අධ්‍යක්ෂිකා, විශේෂඥ වෛද්‍ය ධම්මිකා ජයලත් මහත්මිය සඳහන් කළේ, පවතින පවුල් සෞඛ්‍ය සේවා නිලධාරිනියන්ගේ හිඟයට යම් විසඳුමක් ලෙස විශ්‍රාමික පවුල් සෞඛ්‍ය නිලධාරිනියන් බඳවාගෙන ඔවුන් පදිංචි ප්‍රදේශයන්ට ආසන්නව පත්වීම් ලබා දීමත්, දැනට ගැබිනි මාතාවන් 3000ක් සඳහා පවුල් සෞඛ්‍ය සේවා නිලධාරිනියන් කටයුතු කළ ද මේ වනවිට නිවාස ආශ්‍රිතව දරු ප්‍රසූත සිදු නොවන තත්ත්වයක් පවතින බැවින් එක් නිලධාරිනියකට ගැබිනි මාතාවන් 5000ක් දක්වා වැඩි කිරීම උචිත වන බවත්ය.
