තමිල්නාඩු ප්රාන්ත සභා මැතිවරණ ප්රතිඵල නිකුත් වී දින හතරක් ගතවී ඇතත්, තමිල්නාඩු වෙට්රි කළගම් (TVK) නායක විජේ ට මහ ඇමති ලෙස දිවුරුම් දීමට මෙතෙක් අවස්ථාව හිමිව නොමැත.
වැඩිම ආසන සංඛ්යාවක් දිනාගත් පක්ෂය බවට පත්වුවද, රජයක් පිහිටුවීමට අවශ්ය ස්ථාවර බහුතරය සපුරා ගැනීමට නොහැකි වීම මෙම ප්රමාදයට හේතු වී තිබේ.
ආසන 234කින් සමන්විත තමිල්නාඩු ප්රාන්ත සභාවේ බලය පිහිටුවීම සඳහා මන්ත්රීවරුන් 118 දෙනෙකුගේ සහාය අවශ්ය වේ. මෙවර මැතිවරණයේදී විජයිගේ TVK පක්ෂය ආසන 108ක් ජයග්රහණය කළ අතර, කොංග්රස් පක්ෂයේ මන්ත්රීවරුන් 5 දෙනෙකුගේ සහායද ඇතිව එම සංඛ්යාව මේ වන විට 113 දක්වා ඉහළ ගොස් ඇත.
කෙසේ වෙතත්, රජයක් පිහිටුවීමට තවත් මන්ත්රීවරුන් 5 දෙනෙකුගේ සහාය අත්යවශ්යව පවතී.
මේ සම්බන්ධයෙන් TVK පක්ෂයේ ඉහළ පෙළේ කමිටුවක් VCK පක්ෂය සහ ස්වාධීන මන්ත්රීවරුන් සමඟ දැඩි සාකච්ඡා පවත්වමින් සිටින බව වාර්තා වේ.
ඊයේ (06) දිනයේදී ආණ්ඩුකාර ආර්.එන්. රවී මහතා හමුවූ විජේ, තමන්ට රජයක් පිහිටුවීමට ඇති අයිතිය ප්රකාශ කර සිටියද ආණ්ඩුකාරවරයා ඔහුට දිවුරුම් දීම සඳහා ආරාධනා කර නැත.
රජයක් පිහිටුවීමට අවශ්ය මන්ත්රීවරුන් 118 දෙනාගේ සහාය පළ කරන ලිපි පෞද්ගලිකවම ඉදිරිපත් කළහොත් පමණක් මීළඟ පියවර ගන්නා බව ආණ්ඩුකාරවරයා නිශ්චිතවම ප්රකාශ කර ඇති බව විදෙස් මාධ්ය වාර්තා කරයි.
පවතින අසාමාන්ය දේශපාලන වාතාවරණය තුළ කිසියම් අකටයුත්තක් සිදුවීම වැළැක්වීම සඳහා මධ්යම බුද්ධි අංශය (IB) අනතුරු ඇඟවීම් කර ඇති බව ද වාර්තා වේ.
ඒ අනුව ආණ්ඩුකාර මන්දිරය, TVK ප්රධාන කාර්යාලය සහ ප්රධාන දේශපාලන නායකයින්ගේ නිවාස අසල පොලිස් ආරක්ෂාවක් යොදවා ඇති අතර කටකතා ව්යාප්ත වීම වැළැක්වීමට සමාජ මාධ්ය නිරීක්ෂණ ඒකකයක්ද ක්රියාත්මක වේ.
මේ අතර, තමිල්නාඩු වෙට්රි කළගම් (TVK) රජයක් පිහිටුවීමට තමන් කිසිදු බාධාවක් නොකරන බව හිටපු මහ ඇමති සහ DMK නායක එම්.කේ. ස්ටාලින් මහතා ප්රකාශ කර ඇත.
පෞද්ගලික පුවත් සේවයකට සම්මුඛ සාකච්ඡාවක් ලබාදෙමින් ඔහු සඳහන් කර ඇත්තේ, තවත් මැතිවරණයක් පැවැත්වීමට හෝ ආණ්ඩුක්රම ව්යවස්ථාමය අර්බුදයක් ඇති කිරීමට තමන් අදහස් නොකරන බවය.
කෙසේ වෙතත් ආණ්ඩුකාරවරයා දැනට ප්රාන්තයෙන් බැහැරව සිටින බැවින් ඔහු යළි චෙන්නායි වෙත පැමිණි පසු තීරණාත්මක නිල ප්රකාශයක් නිකුත් වනු ඇතැයි අපේක්ෂා කෙරේ.
TVK පක්ෂය සැලසුම් කරන්නේ එළැඹෙන මැයි 10 වන දිනට පෙර අවශ්ය බහුතරය පෙන්වා දිවුරුම් දීමේ උත්සවය පැවැත්වීමට බව විදෙස් පුවත් වැඩිදුරටත් සඳහන් කර තිබේ.
