දිවයිනේ බොහෝ ප්රදේශවලට අද පස්වරු 1 න් පසු ගිගුරුම් සහිත වැසි ඇති විය හැකි බව කලගුණ විද්යා දෙපාර්තමේන්තුව පවසයි.
ගිගුරුම් සහිත වැසි සමඟ ඇති විය හැකි තාවකාලික තද සුළංවලින් සහ අකුණු මඟින් සිදු වන අනතුරු අවම කර ගැනීමට අවශ්ය පියවර ගන්නා ලෙස කාලගුණ විද්යා දෙපාර්තමේන්තුවේ කාර්යයේ නියුතු කාලගුණ විද්යාඥ මලිත් ප්රනාන්දු මහතා පැවැසීය.
මේ අතර මාවනැල්ල හා ඒ අවට ප්රදේශවලට ඊයේ (20) ඇඳහැළුණු වර්ෂාව සමඟ ඇති වූ සුළගින් නිවාස රැසකට හානි සිදුව ඇති අතර අධිබලැති විදුලි රැහන් පද්ධතියකටද හානි සිදුව එම ප්රදේශවල ගමනා ගමන කටයුතු සම්පූර්ණයෙන් ඇණ හිට තිබේ.
ඊයේ (20) රාත්රී 11.00 දක්වා වලංගුවන පරිදි කාලගුණ විද්යා දෙපාර්තමේන්තුව නිකුත්කළ ප්රබල අකුණු පිළිබඳ අවවාදාත්මක නිවේදනය දිවයිනේ සියලු පළාත් සඳහා නිකුත් කර තිබිණ.
බස්නාහිර, සබරගමුව, මධ්යම, දකුණු සහ වයඹ පළාත්වලත් අනුරාධපුර දිස්ත්රික්කයේත් ඇතැම් ස්ථානවලටත් අද දිනයේ දී මි.මී. 100ක පමණ තද වැසි ඇති විය හැක.
මධ්යම, සබරගමුව, උතුරු මැද සහ ඌව පළාත්වලත් ගාල්ල, මාතර සහ කුරුණෑගල දිස්ත්රික්කවලත් ඇතැම් ස්ථානවල අලුයම් කාලයේදී මීදුම් සහිත තත්ත්වයක් පැවැතිය හැකිය.
ඊයේ(20) පෙරවරු 8.30න් අවසන් වූ පැය 24 තුළ වැඩිම වර්ෂාපතනය ලෙස මි.මී 75ක වර්ෂාපතනයක් හංවැල්ල ප්රදේශයෙන් වාර්තා වූ බව කාලගුණ විද්යා දෙපාර්තමේන්තුව සඳහන් කරයි.
කෙසේ වෙතත් සවස් කාලයේ සහ රාත්රී කාලයේ වැසි පැවැතියත් දහවල් කාලයේ සිරුරට දැනෙන අවධානය යොමුකළ යුතු මට්ටමේ උණුසුම ඉදිරි දිනවලදීත් බලාපොරොත්තු වන බව ද කාර්යයයේ නියුතු කාලගුණ විද්යාඥ මලිත් ප්රනාන්දු මහතා පැවැසීය. ඒ අනුව අද(21) දිනයේ උතුරු, උතුරු-මැද, වයඹ, බස්නාහිර, සබරගමුව, නැඟෙනහිර, දකුණු පළාත්වලත් මොනරාගල දිස්ත්රික්කයේත් ඇතැම් ප්රදේශවල මිනිස් සිරුරට දැනෙන උණුසුම අවධානය යොමුකළ යුතු මට්ටමක පැවැතිය හැකි බව ද කාලගුණ විද්යා දෙපාර්තමේන්තුව උණුසුම් කාලගුණය පිළිබඳ අවවාදාත්මක නිවේදනයක් නිකුත් කරමින් සඳහන් කරයි.
උපාලි කරුණාරත්න, අරණායක – රෝහණ ජයරත්න
