සෞඛ්ය හා ජනමාධ්ය ඇමැති නලින්ද ජයතිස්ස මහතා හලාවත මහ රෝහලේ විශේෂ නිරීක්ෂණ චාරිකාවක නිරත වී ගංවතුර හේතුවෙන් සිදුවු විනාශය නිරීක්ෂණය කර කඩිනමින් රෝහලේ අනිකුත් වාට්ටු ඒකක ආරම්භ කිරීමට අවශ්ය කටයුතු සැලසීමට පාලනාධිකාරියට පොරොන්දු විය.
සෞඛ්ය ඇමැතිවරයා මෙලෙස නිරීක්ෂණ චාරිකාවක නිරත වූයේ පසුගිය දින පැවති ගංවතුර ගලාවිත් සමස්ත රෝහල් පද්ධතියේ වෛද්ය උපකරණ හා අනිකුත් භෞතික භාණ්ඩ හා මේ වන විට රෝහලේ කටයුතු කුමන ආකාරයෙන් සිදුවනවා දැයි සොයා බැලීමේ අරමුණිනි.
සෞඛ්ය හා ජනමාධ්ය ඇමැති නලින්ද ජයතිස්ස මහතා සමඟ රාජ්ය පරිපාලන හා පළාත් පාලන ඇමැති චන්දන අබේරත්න, ගයාන් ජානක, අජිත් ගිහාන්, හිරුනි විජේසිංහ, ලෝක සෞඛ්ය සංවිධානයේ මෙරට නියෝජීත වෛද්ය රාජේෂ් සම්භාජීරාඕ පාණ්ඩවි, සෞඛ්ය සේවා අධ්යක්ෂ ජනරාල් අසේල ගුණවර්ධන මහත්වරුන් ඇතුළු අමාත්යාංශ නිලධාරීහු පිරිසක් මේ අවස්ථාවට එක්වූහ.
රෝහලේ තත්ත්වය ගැන මෙහිදී රෝහල් අධ්යක්ෂ විශේෂඥ වෛද්ය සුමිත් අත්තනායක මහතා ඇමැතිවරයා ඇතුළු සෞඛ්ය අමාත්යාංශ නිලධාරීන් හා අනිකුත් පිරිස් දැනුම්වත් කළහ. එහිදී ඇමැතිවරයාගේ විශේෂ අවධානයට ලක්වුයේ හලාවත මහ රෝහලේ ස්ථාපිත කර තිබූ සීටි ස්කෑන් යන්ත්රය ගංවතුරින් අක්රීයවීම ගැනයි.ඒ සම්බන්ධව හා වකුගඩු ඒකකය, ශල්යාගාර දෙක හා අනිකුත් ඒකක නැවත ආරම්භ කිරීම සම්බන්ධව ඇමැතිවරයා විශේෂ අවධානය යොමු කළේය.
ඇමැතිවරයා රෝහල් සෞඛ්ය කාර්ය මණ්ඩලය හා රෝගීන් සමඟ සුහද කතාබහක ද නිරත විය.
පුත්තලම අතිරේක –
හිරාන් ප්රියංකර ජයසිංහ
