අධිකරණය මඟින් රක්ෂිත බන්ධනාගාරගත කරන ලෙස නියම කරන ලද හිටපු පාර්ලිමේන්තු මන්ත්‍රී අතුරලියේ රතන හිමියන් සහ හිටපු අමාත්‍යවරුන් වන රාජිත සේනාරත්න, නිමල් ලන්සා මහත්වරුන්ට පිටතින් කෑම ගෙන ඒම සඳහා අවසර හිමි වී ඇතැයි බන්ධනාගාර දෙපාර්තමේන්තු වාර්තා සඳහන් කරයි. එහිදී ගිහි දායකයන් විසින් අතුරලියේ රතන හිමියන්ට කොළඹ ප්‍රසිද්ධ හෝටලයකින් උදෑසන සහ දිවා දානය ලබාදීමට කටයුතු කර ඇතැයි ද වාර්තා වේ. රක්ෂිත බන්ධනාගාරගත කළ හිටපු පාර්ලිමේන්තු මන්ත්‍රී අතුරලියේ රතන හිමියන් කොළඹ මැගසින් බන්ධනාගාරයේ ‘ජී’ වාට්ටුවේ රඳවා ඇති අතර හිටපු අමාත්‍ය රාජිත සේනාරත්න මහතා මේ වන විට කොළඹ රිමාන්ඩ් බන්ධනාගාරයේ ‘එන්’ වාට්ටුවේ රඳවා සිටී.
මේ අතර අතුරලියේ රතන හිමියන්ගේ සහ හිටපු අමාත්‍ය රාජිත සේනාරත්න මහතාගේ ආරක්‍ෂාව ද අදාළ බන්ධනාගාරයන් තුළ ස්ථාපිත කර ඇති බව ද බන්ධනාගාර උසස් නිලධාරියෙක් ‘දිනමිණ’ට කීය.
රාජිත සේනාරත්න මහතා බන්ධනාගාරය වෙත රැගෙන ආ අවස්ථාවේ ඔහුව බන්ධනාගාර වෛද්‍යවරයකු විසින් පරික්‍ෂා කළ අතර හිටපු අමාත්‍යවරයා යහපත් සෞඛ්‍ය තත්ත්වයෙන් පසුවන බව වෛද්‍යවරුන් නිර්දේශ කළ බවත් ඒ අනුව ඔහුව කොළඹ රිමාන්ඩ් බන්ධනාගාරයේ ‘එන්‘ වාට්ටුවට යොමු කළ බවත් එම නිලධාරියා වැඩිදුරටත් පැවැසීය.
මීගමුව බන්ධනාගාරයේ රඳවා සිටින හිටපු අමාත්‍ය නිමල් ලන්සා මහතාට විශේෂ ආරක්ෂාවක් සහ වෛද්‍ය පහසුකම් සලසන ලෙස අධිකරණය විසින් බන්ධනාගාර දෙපාර්තමේන්තුවට නියෝග කර තිබූ අතර ඔහුව ආරක්ෂිතව මීගමුව බන්ධනාගාරයේ ‘ඒ-වන්’ වාට්ටුවේ රඳවා ඇතැයි වාර්තා වේ. එමෙන්ම බන්ධනාගාර වෛද්‍යවරයා විසින් සිදු කළ පරීක්ෂණයෙන් ඔහුගේ සෞඛ්‍ය තත්ත්වය යහපත් බවට තහවුරු වී තිබේ. මේ තිදෙනාම බන්ධනාගාරයෙන් සපයන ලද කොට්ටයක සහ පැදුරක නිදිසුවය ලබන බව ද බන්ධනාගාර ආරංචි මාර්ග කියයි. රක්ෂිත බන්ධනාගාරගත කළ හිටපු අමාත්‍ය නිමල් ලන්සා මහතාව හමු වීමට පිටස්තර පුද්ගලයන් පැමිණීම සීමා කරන ලෙස ඒ මහතාගේ බිරිය විසින් බන්ධනාගාර අධිකාරිය වෙත ඉල්ලීමක් කර තිබිණි.
ඒ පිළිබඳව අවසරය හිටපු අමාත්‍යවරයාගේ කැමැත්ත අකැමැත්ත අනුව සිදු වනු ඇතැයි ද සඳහන්ය
