පොලිස් දෙපාර්තමේන්තුවට වෙනම වැටුප් ව්‍යුහයක් ඇති කරන බව මහජන ආරක්ෂක ඇමැති ආනන්ද විජේපාල මහතා පවසයි. අද වනවිට ශ්‍රී ලංකා පොලිස් සේවය දේශපාලනීකරණයෙන් නිදහස් කර ස්වාධීන ආයතනයක් ලෙස කටයුතු කිරීමට අවස්ථාව දී ඇති අතර කිසිම පොලිස් නිලධාරියකුගේ වැටුප් අඩුකිරීමක් කර නොමැති බව ද ඇමැතිවරයා පැවසීය. එමෙන්ම මේ වනවිට පොලිස් සේවයේ ව්‍යුහාත්මක වෙනස්කම් රැසක් සිදුකරන අතර පසුගිය රජයන් විසින් විධිමත්ව සිදු නොකළ සියලු විමර්ශන විධිමත්ව කරන බව ද ඇමැතිවරයා ප්‍රකාශ කළේය.
මහජන ආරක්ෂක ඇමැති ආනන්ද විජේපාල මහතා මේ බව සඳහන් කළේ ආරක්ෂක හා මහජන ආරක්ෂක අමාත්‍යාංශවලට අයත් වැය ශීර්ෂයන් පිළිබඳ පාර්ලිමේන්තු විවාදයට එක්වෙමිනි.
වැඩිදුරටත් අදහස් දැක්වූ ඇමැතිවරයා මෙසේ ද පැවැසීය.
“ශ්‍රී ලංකා පොලිස් සේවය දේශපාලනීකරණයෙන් අපි නිදහස් කර තිබෙනවා. කිසිම පොලිස් නිලධාරියකු හෝ රාජ්‍ය සේවකයකුගේ වැටුප් අඩු කිරීමක් කර නැහැ. අවුරුදු කිහිපයකට පසු මූලික වැටුප වැඩි කළා. දීමනා වැඩිකර තිබෙනවා. දැනට පොලිස් කොස්තාපල්වරයකුගේ මූලික වැටුප රුපියල් 29,540ක්. ඒක මේ අවුරුද්දේ 44,293ක් වෙනවා. ඒකට මේ අවුරුද්දේ වැඩිවෙනවා 6,182ක්, පොලිස් සාජන්වරයකුට රුපියල් 6,441.54, SI කෙනකුට, 6551.72ක්, IP කෙනකුට 7040.24, CI කෙනකුට 7655.74ක් ASP කෙනකුට 8244.11, SP, SSP කෙනකුට 9,925ක්, DIG සීනියර් DIG, 11,118, IGP 13,223ක් ලෙස මේ අවුරුද්දේ වැඩි වෙනවා.
ඊට අමතරව පොලිස් කොස්තාපල්වරයකුගේ දැනට තියෙන මූලික වැටුප 29,540 මේ අවුරුද්දේ දී 44,293ක් වෙනවා 2026දී 46,921 වෙනවා 2027 දී 49,550ක් වෙනවා අද මූලික වැටුප 29,540ක් තියෙන කොට 2027 වසරේදී 49,550ක් වෙනවා. ඒවගේම මේකට අදාළව අනෙකුත් දීමනාත් වැඩි වෙනවා.”
ස්වර්ණා විජේකෝන්, සන්ධ්‍යා කරුණාරත්න
