අලුත් රජය යටතේ මේ වසර වඩාත් සුබ වේවි – අස්ගිරි පාර්ශ්වයේ මහානායක වරකාගොඩ ශ්‍රී ඤාණරතන නාහිමි
නව වසරේ උදාව ජනතාව සමරනු ලබන්නේ අලුත් රජයක් යටතේ බලාපොරොත්තු ගොන්නක් සමඟ බවත් පවතින පසුබිම යටතේ පෙර වසරවලට වඩා මෙම වසර ශ්‍රී ලාංකයීය ජනතාවට වඩා සුබදායි වනු ඇති බවත් අස්ගිරි පාර්ශ්වයේ මහානායක වරකාගොඩ ශ්‍රී ඤාණරතන නාහිමියෝ පවසති.
ජාති,ආගම්,පක්ෂ භේද සියල්ල පසෙකලා සියලු ජනතාව ශ්‍රී ලාංකිකයින් ලෙස කල්පනා කරමින් රටේ දියුණුව පිණිස ඒකාබද්ධව කටයුතු කිරීම වැදගත් බවත් නව වසරේ ඒ සඳහා සියලු දෙනා කැපවනු ඇතැයි විශ්වාස කරන බවත් උන්වහන්සේ කීහ.
නව වසර නිමිත්තෙන් ශුභාශිංසන පණිවුඩයක් නිකුත් කරමින් අස්ගිරි මහනාහිමියෝ මෙසේද පැවසූහ. උදාවූ නව වසර සෞභාග්‍යමත් වාසනාවන්ත වර්ෂයක් වේවායි ප්‍රාර්ථනා කරනවා. ශ්‍රී ලංකාද්වීපය පිළිබඳ කතා කරන විට දළදා වහන්සේ, ශ්‍රී බෝධීන් වහන්සේ ඇතුළු ධාතූන් වහන්සේලා මේ රටේ වැඩ ඉන්නවා. ඒවාහි ආශිර්වාදයක් නිතැතින්ම ජනතාවට ලැබෙනවා. පසුගිය වසරවලට වඩා 2025 වසර වාසනාවන්ත වසරක් වනු ඇතැයි විශ්වාස කළ හැකියි. අපි නව රජයක් යටතේ තමයි 2025 වසරට පිවිසෙන්නේ. සමගි සම්පන්නව සියලුදෙනා ඒකාබද්ධව මේ රට දියුණු කළ යුතුයි. -අසේල කුරුළුවංශ
කතාව අඩුකර වැඩියෙන් වැඩ කරන්න – මල්වතු පාර්ශ්වයේ අනුනායක දිඹුල්කුඹුරේ විමලධම්ම නාහිමි
නව වසරේ හෝ කතාව අඩුකර වැඩියෙන් වැඩ කිරීමට සියලුදෙනා උනන්දු වුවහොත් රට ඉදිරියට ගෙනයා හැකි බව මල්වතු පාර්ශවයේ අනුනායක පූජ්‍ය දිඹුල්කුඹුරේ විමලධම්ම නාහිමියෝ පවසති.
දේශාපාලනඥයින් හා රාජ්‍ය සේවකයින් හොර, බොරු, වංචාවලට ඉඩක් නොතබා අවංකව තමන්ගේ සේවය රට වෙනුවෙන් ලබා දෙන්නේ නම් නව වසරේ බලාපොරොත්තු වන ඉලක්ක කරා ගමන් ගැනීම අපහසු නොවනු ඇතැයි ද උන්වහන්සේ කීහ.
නව වසර වෙනුවෙන් ශුභාශිංසන පණිවුඩයක් නිකුත් කරමින් මල්වතු අනුනායක ස්වාමින්ද්‍රයන් වහන්සේ මෙසේද පැවසූහ.
ලැබුවා වූ 2025 වසර ලංකාවාසී හා ලෝකවාසී සියලු ජනතාව සුබ නව වසරක් වේවායි ප්‍රාර්ථනා කරනවා. රටක දියුණුව රඳා පවතින්නේ ඒ රටේ ජනතාව කරන කියන කටයුතු මතයි. ඒ අනුව සෑම ක්ෂේත්‍රයකම ප්‍රගතියක් ඇති කර ගැනීම නව වසරේ අප හමුවේ පවතින ප්‍රධානතම අභියෝගයයි. සෞඛ්‍ය, අධ්‍යාපන, කෘෂිකර්ම ඇතුළු සියලු ක්ෂේත්‍රවල මේ ප්‍රගතිය ලබා ගැනීම සඳහා සියලු දෙනා කැපවිය යුතුයි.
අපි වැඩේට වඩා කතාවට දක්ෂයි. පසුගිය හැත්තෑපස් වසරක කාලය තුළ ඒ අත්දැකීම අපිට තිබෙනවා. දැන් හෝ කතාව අඩුකර වැඩ කරන්න උනන්දු විය යුතුයි. ඒ වගේම වැඩේට අවංක වීමත් වැදගත්. හොර, බොරු, වංචා නතර කර වගකීම් ඉටු කරන්න කැපවෙමු. එහෙම වුණොත් තමයි රටක දියුණුවක් දකින්න ලැබෙන්නේ. ඒ අය හැම වෙලාවෙම වාග්චාතූර්ය ගැන උද්ධාමයට පත්ව කතා කරනවා. වැඩවලට කැප වෙනවා අඩුයි. – අසේල කුරුළුවංශ
සැබෑ ආධ්‍යාත්මික සතුට සොයා යාමට ශක්තිය ධෛර්යය ලැබේවා – මැල්කම් කාදිනල් රංජිත් හිමිපාණෝ
පිරිසිදු ජීවිතයක් ගත කරමින් සැබෑ ආධ්‍යාත්මික සතුට සොයා යාමට ශක්තිය ධෛර්යය ලැබේවායි කොළඹ අතිඋතුම් මැල්කම් කාදිනල් රංජිත් හිමිපාණන් අලුත් අවුරුදු සුබපැතුම් පණිවුඩයක් යොමු කරමින් පවසයි.
එම පණිවුඩයේ වැඩිදුරටත් මෙසේ සඳහන් වෙයි. සෑම විසිපස් වසරකටම වරක් ක්‍රිස්තුස් වහන්සේගේ උපතේ ජුබිලිය සමරනවා. මෙවරත් අපි ජුබිලි වසර සමරනවා. මේ වසරේදී සෑම අංශයකම ආධ්‍යාත්මික ප්‍රබෝධයක් සඳහා කටයුතු කරන්න යැයි ශුද්ධ වූ පැන්සිස් පාප්වහන්සේ අපෙන් ඉල්ලීමක් කර තිබෙනවා. – රන්මලී සෝමසිරි
රටත් ජනතාවත් දශක ගණනාවක් දුටු සිහින සැබෑ වෙන නව යුගයක් – ජනාධිපති අනුර කුමාර දිසානායක
ශ්‍රී ලාංකික අප 2025 නව වසරට පා තබන්නේ රටත්, ජනතාවත් දශක ගණනාවක් පුරා දුටු සුබ සිහින මල්ඵල ගැන්වෙන නව යුගයක උදාවත් සමඟින් බව ජනාධිපති අනුර කුමාර දිසානායක මහතා නව වසරට සුබපැතුම් පණිවුඩයක් නිකුත් කරමින් කියා සිටී.
එහි වැඩිදුරටත් මෙසේ ද සඳහන් වේ.
දිවයිනේ උතුර, නැඟෙනහිර, බටහිර හා දකුණ යන සතර දිසාවන් යා කරමින්, සියලු ජනතාවගේ විශ්වාසය දිනාගෙන පාර්ලිමේන්තුවේ බහුතර බලයක් සහිත ආණ්ඩුවක් ගොඩනැඟීමට 2024 පාර්ලිමේන්තු මැතිවරණයේදී අපට හැකි විය. ඒ අනුව ජනතාව අපේක්ෂා කරන යහපත් රාජ්‍යය ගොඩනැඟීම වෙනුවෙන් පැවැති දේශපාලන සංස්කෘතියේ විසල් පරිවර්තනයක් සිදු කරමින් ජනවරමේ වගවීම හා වගකීම ඉටු කිරීමට මේ වන විට අපි යුහුසුලුව කටයුතු කරමින් සිටිමු.
ග්‍රාමීය දිළිඳු බව අවසන් කිරීම, ක්ලීන් ශ්‍රී ලංකා වැඩසටහන, ඩිජිටල් ආර්ථිකයක් ගොඩනැඟීම රටෙහි ප්‍රමුඛ සංවර්ධන අවශ්‍යතා ලෙස අපි හඳුනාගෙන සිටිමු. සමාජයීය, පාරිසරික හා ආචාර ධාර්මික පිබිදීමක් ඔස්සේ සමාජය වඩා දියුණු තලයකට ඔසවා තැබීම අරමුණු කර ගත් “ක්ලීන් ශ්‍රී ලංකා” වැඩසටහන නව වසරේ උදාවත් සමඟ ක්‍රියාවට නැංවෙන්නේ ඒ පසුබිම අනුවයි. මෙකී පරිවර්තනාත්මක සංවර්ධන ව්‍යායාමය සමඟ රටක් ලෙස අප 2024 වසරේදී ලබා ගත් ආර්ථික ස්ථාවරත්වය තවදුරටත් තහවුරු කර ගනිමින් “පොහොසත් රටක් – ලස්සන ජීවිතයක්” සැමට උරුම කර දීම වෙනුවෙන් නව ආකල්ප පුබුදුවා, නව අධිෂ්ඨානයක් සිත් දරා සහෘදත්වයත් සමඟ පෙරට පැමිණීමට 2025 නව වසර උදාව මහඟු අවස්ථාවක් ජනිත කර ඇති බව මම තරයේ විශ්වාස කරමි.
නිදහසින් පසු ලංකා ඉතිහාසයේ පළමු වතාවට ජනතාහිතෛෂී පාලනයක් ඇති කරමින් සියලු ජනතාව එකාවන්ව දුටු සංවර්ධිත ශ්‍රී ලංකාවක් පිළිබඳ සිහිනය යථාර්ථයක් කිරීමේ අවස්ථාව දැන් ඔබට, අපට හිමිව ඇත. අත්හළ නොහැකි මෙම භාරධූර වගකීම අප සියලුදෙනාගේ දෙවුර මත පැටවී තිබේ. ඒ වගකීම පිළිබඳ මනා අවබෝධයක් අපට ඇත. මේ සියවසේ මගහැරුණු ජයග්‍රහණ යළි රටට අත්කර දීමටත්, එකී ජනතා සිහින යථාවක් කිරීමටත් 2025 නව වසරේදී තවත් වීර්යයෙන් සහ සද්- අධිෂ්ඨානයෙන් යුතුව අපි කැපවී ක්‍රියා කරන්නෙමු.
ශ්‍රී ලංකාව බැබළවීමට සැම එක්වෙමු – අගමැතිනී, ආචාර්ය හරිනි අමරසූරිය
ලෝකය තුළ අභිමානවත් සහ සමෘද්ධිමත් ජාතියක් ලෙස Òශ්‍රී ලංකාවÓ යන නාමය බැබළවීමට අප සැම එක්ව කටයුතු කරමු යැයි අගමැතිනී, ආචාර්ය හරිනි අමරසූරිය මෙණෙවිය නව වසර වෙනුවෙන් සුබපැතුම් පණිවුඩයක් නිකුත් කරමින් සඳහන් කරයි.
නව වසර සාර්ථක කර ගැනීමටත්, අප රටට යහපත් අනාගතයක් උදා කිරීමටත් අප හා එක්වන ලෙස සියලු දෙනාටම නව වසර ආරම්භ කරන මේ මොහොතේ තමන් ආරාධනා කරන බව එම සුබපැතුම් පණිවුඩයෙන් සඳහන් කරයි.
එම නිවේදනයේ මෙසේද සඳහන් වේ.
ශ්‍රී ලාංකික අපට පසුගිය 2024 වසර සැබැවින්ම පරිවර්තනීය වසරක් විය. භේදයකින් තොරව එකට එක්ව සංවේදී, පිරිසිදු හා ජනතාව කේන්ද්‍ර කර ගත් දේශපාලන සංස්කෘතික වෙනසක් මෙරට ජනතාව තෝරාගෙන ඇත.
වගකිවයුතු රජයක් ලෙස අපි ආර්ථිකය, කර්මාන්ත, අධ්‍යාපන ඇතුළු විවිධ තීරණාත්මක ක්ෂේත්‍රවල සංවර්ධනය වෙනුවෙන් කැපවී සිටිමු. සෑම පුරවැසියෙකුටම ජාතිය, ස්ත්‍රී පුරුෂභාවය, වාර්ගික හෝ ආගමික භේදයකින් තොරව සාමකාමී, නිදහස්, ගෞරවනීය සහ තෘප්තිමත් ජීවිතයක් ගත කළ හැකි අනාගතයක් නිර්මාණය කිරීම අපගේ දැක්මයි.
පසුගිය කාලය තුළ ජාතියක් ලෙස එක්සත් වීමට අපට අවස්ථා කිහිපයක් ලැබුණ නමුත් එම අවස්ථාවන්හි නිසි ඵල ලබා ගැනීමට අප අසමත් විය. කෙසේ වෙතත්, මෙම ලැබුණු අවස්ථාව මග නොහැර , රැක ගැනීමට සාමූහිකව කටයුතු කළ යුතුය. මේ තීරණාත්මක මොහොතේ රජය මහජනතාවට සේවය කිරීමට පූර්ණ වශයෙන් කැපවී සිටී.
වත්මන් අභියෝග හඳුනාගෙන අනාගතය ශක්තිමත් කරමු – විපක්ෂ නායක සජිත් ප්‍රේමදාස
වර්තමාන අභියෝග නිවැරැදිව හඳුනා ගනිමින් අනාගතය ශක්තිමත් කිරීමට කැපවෙමු යැයි ශ්‍රී ලංකා පාර්ලිමේන්තුවේ විපක්ෂ නායක සජිත් ප්‍රේමදාස මහතා නව වසරට සුබපැතුම් එක් කරමින් කියා සිටී.
විපක්ෂ නායකවරයාගේ සුබපැතුම් පණිවිඩයේ මෙසේද සඳහන් වේ.
අපේ මාතෘභූමිය වර්තමානයේ මුහුණ දී ඇති අභියෝග නිවැරැදිව හඳුනා ගනිමින් එම අභියෝග ජය ගැනීමට අවශ්‍ය ධෛර්ය, ශක්තිය හා දැක්මක් ඇතිව කටයුතු කිරීමට උදාවන නව වසරේ අප සියලු දෙනා අදිටන් කර ගත යුතු වේ. ඒ සඳහා ශ්‍රී ලාංකේය ජාතිය ගොඩනැඟීම සඳහා වූ වැඩපිළිවෙළ අප තවදුරටත් ශක්තිමත් කළ යුතුය.
අතීතයේ මෙන් පටු වාර්ගික, ආගමික මතවාද තුළ භේදභින්න කළ දේශපාලනික වැඩසටහන් යළිත් ඉස්මතු නොවීමට කටයුතු කිරීම එහිදී අතිශය වැදගත් වේ. ගෙවී ගිය වසර හතරකට ආසන්න කාලය තුළ රටේ ජනතාව මුහුණදුන් අවිනිශ්චිත බව, අපේක්ෂා භංගත්වය අවසන් කොට ජනතාවට මාතෘභූමිය තුළ රැඳී සිටීමට හිතකර ආර්ථික, දේශපාලන, සමාජයීය වාතාවරණය නිර්මාණය කිරීම අපගේ අපේක්ෂාවයි. මෙහිදී අප සිදු කළ යුත්තේ අසහනය පරාජය කොට සහනය ජයග්‍රහණය කරවීම සඳහා වූ මාර්ගය නිවැරැදිව එළිපෙහෙළි කර ගැනීමයි. රටේ ජනතාව මුහුණ දී ඇති ආර්ථික අර්බුදය හමුවේ බිඳවැටී ඇති ජීවිත යළිත් ගොඩනැඟීමට නව ආර්ථික වැඩපිළිවෙළක් සහ ක්‍රියාදාමයක් අවශ්‍ය බව යළි යළිත් තහවුරු වෙමින් පවතී. රටේ අනාගතය වෙනුවෙන් දේශපාලන, සමාජයීය හා ආර්ථික ඉදිරි වැඩපිළිවෙළ ශක්තිමත් කිරීමට නව වසරේ අපි කැපවීමෙන් කටයුතු කරමු.
