ශ්‍රී ලංකාවේ එක්සත් අරාබි එමීර් රාජ්‍යයේ (UAE) තානාපති Khaled Nasser AlAmeri මහතා හා කථානායක (ආචාර්ය) අසෝක රන්වල මහතා අතර හමුවක් පසුගියදා පාර්ලිමේන්තුවේදී පැවැත්විණි.
2025 පෙබරවාරි මාසයේදී පැවැත්වීමට නියමිත ලෝක රාජ්‍ය සමුළුව (WGS) ඇමතීමට එක්සත් අරාබි එමීර් රාජ්‍යයේ ජනාධිපතිවරයා මෙරට ජනාධිපති අනුර දිසානායක මහතාට ආරාධනා කිරීමට නියමිත බව තානාපතිවරයා මෙහිදි කථානායකවරයාට දැනුම් දී ඇත. එමෙන්ම 2024 වසරේදී මෙම සමුළුව ඉන්දීය අගමැති නරේන්ද්‍ර මෝදි මහතා ඇමතූ බවද තානාපතිවරයා මෙහිදී ප්‍රකාශ කළේය.
එමෙන්ම දූෂණයට එරෙහිව කටයුතු කිරීමට ඇති හොඳම ක්‍රමය රාජ්‍ය සේවය මෙහෙයවීම මාර්ගගත (Online) ක්‍රමය ඔස්සේ සිදු කිරීම බව මෙහිදී සඳහන් වූ අතර මේ සම්බන්ධයෙන් අවශ්‍ය වන විශේෂඥ දැනුම බෙදාගැනීමට තම රාජ්‍ය කැමැත්තෙන් සිටින බවද තානාපතිවරයා මෙහිදී පෙන්වා දුන්නේය.
එසේම විනිවිදභාවයෙන් යුතු ආකර්ෂණීය ආයෝජන ක්‍රවේදයන් සකස් කිරීමේ වැදගත්කම පිළිබඳවද මෙහිදී සාකච්ඡා කෙරුණි. එසේම එක්සත් අරාබි එමීර් රාජ්‍යයේ වෙසෙන ශ්‍රී ලාංකිකයන් වෘත්තීයමය දක්ෂතාවයෙන් යුතු සාමකාමී පිරිසක් ලෙස අගය කරන බවද තානාපති Khaled Nasser AlAmeri මහතා මෙහිදී වැඩිදුරටත් සඳහන් කළේය.
තාක්ෂණික සහ පුනර්ජනනීය බලශක්ති ක්ෂේත්‍රයේ ඇති විය හැකි ප්‍රගතිය පිළිබඳව ද දෙපාර්ශ්වය අතර සාකච්ඡා පැවති අතර ආයෝජන පුළුල් කිරීමේ හැකියාව පිළිබඳව ද මෙහිදී අවධානය යොමු කෙරිණි. මීට අමතරව දෙරට අතර සබඳතා තවදුරටත් ශක්තිමත් කිරීම සඳහා ශ්‍රී ලංකා – එක්සත් අරාබි එමීර් රාජ්‍ය පාර්ලිමේන්තු මිත්‍රත්ව සංගමය යළි පණගැන්වීම සම්බන්ධයෙන් ද මෙහිදී සාකච්ඡා කෙරිණි.
මෙම අවස්ථාවට පාර්ලිමේන්තුවේ මහලේකම් කුෂානි රෝහණධීර මහත්මිය ද සහභාගී වූවාය.
