බීර නිෂ්පාදනය උදෙසා ප්රධාන අමුද්රව්ය ලෙස සහල් සහ සීනි භාවිතා කිරීම සඳහා නිෂ්පාදකයින්ට අනුමැතිය නොදෙන ලෙස සුරා බදු කොමසාරිස් ජෙනරාල්වරයා ඇතුළු පිරිසකට නියෝගයක් නිකුත් කරන ලෙස ඉල්ලා අභියාචනාධිකරණයට රිට් පෙත්සමක් ඉදිරිපත් කර තිබේ.
බලපත්රලාභී මත්පැන් අලෙවිකරුවන් පිරිසක් විසින් ගොනුකර ඇති මේ පෙත්සමේ වග උත්තරකරුවන් ලෙස සුරා බදු කොමසාරිස් ජෙනරාල්වරයා සහ එම ආයතනයේ නිලධාරීන්, ශ්රී ලංකා ප්රමිති ආයතනය, නීතිපතිවරයා, පොලිස්පතිවරයා ඇතුළු පිරිසක් නම් කර ඇත.
පෙත්සම්කරුවන් සඳහන් කරන්නේ සුරා බදු පනතේ දෙවන වගන්තිය මගින් “බීර” යනුවෙන් අර්ථකථනය කර තිබෙන්නේ මෝල්ට් වලින් සාදන ලද පැසුණු මත්පැන් බවය.
එහෙත් වර්තමානයේ බොහොමයක් නිෂ්පාදකයින් බීර නිෂ්පාදනය සඳහා ප්රධාන අමුද්රව්ය ලෙස සහල් සහ සීනි භාවිතා කරන බවට තොරතුරු හෙළි වී ඇති බවත් එසේ බීර නිෂ්පාදනය කිරීම සුරා බදු පනතේ විධිවිධානවලට පටහැනි බවත් පෙත්සම්කරුවන් චෝදනා කරයි.
රජය විසින් සහල් නිෂ්පාදනය සඳහා මහජන මුදල් වලින් විශාල සහනාධාරයක් ලබා දෙමින් තිබියදී එසේ නිෂ්පාදනය කරන සහල් බියර් වැනි වාණිජ කර්මාන්තයක් සඳහා යෙදවීම තුළින් ජාතික ආර්ථිකයට අහිතකර බලපෑමක් එල්ල වන බවත් පෙත්සම්කරුවන් සඳහන් කරයි.
මේ හරහා ශ්රී ලංකාවට සහල් වලින් ස්වයංපෝෂිත වීමට නොහැකි තත්ත්වයක් උද්ගත වී ඇති බවත් ඔවුන් පෙන්වා දෙයි.
මත්පැන් නිෂ්පාදනයේ ප්රමිතිය අධීක්ෂණය කිරීම සඳහා ශ්රී ලංකා ප්රමිතිය ආයතනය මගින් වර්තමානයට ගැලපෙන පරිදි ප්රමිති යාන්ත්රණය යාවත්කාලීන වී නොමැති බවත් ඔවුන් පෙන්වා දෙයි.
ඒ අනුව පෙත්සංකරුවන් අධිකරණයෙන් ඉල්ලා සිටින්නේ බීර නිෂ්පාදනය සඳහා ප්රධාන අමුද්රව්ය ලෙස සීනි සහ සහල් භාවිතා කිරීමට අනුමැතිය දීම වළක්වාලන නියෝගයක් සුරා බදු කොමසාරිස් ජෙනරාල්වරයා ඇතුළු වගඋත්තරකරුවන් වෙත නිකුත් කරන ලෙසය.
