සිංහල හා හින්දු අලුත් අවුරුද්ද යනු හුදෙක් සූර්යයා මීන රාශියෙන් මේෂ රාශියට සංක්රමණය වීම සැමරීම පමණක් නොවේ. එය දහස් ගණන් වසරක් මුළුල්ලේ අපේ හෙළ සංස්කෘතිය, ගොවි ජීවිතය සහ මිනිස් සබඳතා මුල් කරගනිමින් ගොඩනැගුණු අභිමානවත් මංගල්යයකි. අතීතයේ සිටම පැවත එන අවුරුදු උත්සවයක මූලික පරමාර්ථය වූයේ ගමේ එකමුතුකම, සහෝදරත්වය සහ සාමූහිකත්වය ශක්තිමත් කිරීමයි.
කෙසේ වෙතත්, වර්තමානය වන විට අපේ රට පුරා පැවැත්වෙන අලුත් අවුරුදු උත්සව දෙස විමසිලිමත්ව බැලීමේදී පෙනී යන්නේ, එම උදාර අරමුණු කෙමෙන් කෙමෙන් ගිලිහී ගොස් ඇති බවයි.
සාමූහිකත්වයේ සිට විකෘතිය දක්වා පිරිහීම,
අතීතයේ අවුරුදු උත්සවයකදී පැවැත්වුණු පංච දැමීම, ඔලිඳ කෙළිය හෝ චතුරංග ක්රීඩාව හරහා බුද්ධියත්, ඉවසීමත් පුහුණු විය. කොට්ට පොරය, කඹ ඇදීම සහ ලිස්සන ගස වැනි ක්රීඩා තුළින් ජවය සහ සාමූහික ශක්තිය ප්රදර්ශනය විය. එහි කිසිදු අශීලාචාර බවක් හෝ අනෙකා පහත් කොට සැලකීමක් තිබුණේ නැත.
නමුත් අද බොහෝ අවුරුදු උත්සව කරා විදේශීය අශීලාචාර සංස්කෘතීන් සහ විකෘති මානසිකත්වයන් රිංගාගෙන ඇත. විශේෂයෙන්ම මිනිසුන්ව අපහසුතාවයට පත් කරන, ශාරීරික හා මානසික පීඩාවන් ගෙන දෙන, සදාචාර විරෝධී බව ඉස්මතු කරන ර්”නවීන” තරඟ රටාවන් අලුත් අවුරුදු පිටිවල රජයනු පෙනේ. මෙය අපේ ජාතික අනන්යතාවය කෙළෙසීමක් මිස අන් කිසිවක් නොවේ.
කෙළෙසෙන ජාතික අනන්යතාවය,
අවුරුදු උළෙලක් යනු සංස්කෘතික අනන්යතාවය විදහා පාන කැඩපතකි. එහෙත්, අද වන විට එම කැඩපත බොඳ වී යමින් පවතී. වාණිජමය වාසි සහ තාවකාලික වින්දනය උදෙසා අපේ දේශීය සිරිත් විරිත් සහ ක්රීඩා රටාවන් විකෘති කිරීම තුළින් සිදුවන්නේ මතු පරම්පරාවට වැරදි පූර්වාදර්ශ ලබා දීමයි. දේශීයත්වයට එහා ගිය මෙවැනි විපරීතයන් ජාතික අභිමානය පලුදු වීමට ප්රධාන හේතුවක් වී ඇත.
අනාගත පරපුර උදෙසා අපේ වගකීම,
සංස්කෘතියක් යනු ගලා යන ගඟක් වැනි ය. එය පිරිසිදුව ඉදිරියට ගලා යාමට ඉඩ දීම වර්තමාන සමාජයේ වගකීමකි. අපේ අනන්යතාවය ආරක්ෂා කර ගැනීම උදෙසා අප පහත කරුණු කෙරෙහි අවධානය යොමු කළ යුතුය.
* දේශීයත්වයට මුල් තැන දීම :- උත්සව සංවිධායකයන් විසින් වාණිජ පරමාර්ථවලින් බැහැරව, සැබෑ සිංහල ජන ක්රීඩා වලට ප්රමුඛතාවය ලබා දිය යුතුය.
* ගුණාත්මකභාවය සුරැකීම :- මිනිසුන්ගේ ආත්මගරුත්වයට හානි වන හෝ සභ්යත්වයට පටහැනි තරඟ රටාවන් සම්පූර්ණයෙන්ම බැහැර කළ යුතුය.
* අධ්යාපනික වටිනාකම :- අවුරුදු උත්සවයක් හරහා ළමා පරපුරට අපේ සිරිත් විරිත්, ගැමි ආහාර සහ ඇඳුම් පැළඳුම් පිළිබඳ නිවැරදි අවබෝධයක් ලබා දිය යුතුය.
එබැවින්, සිංහල අලුත් අවුරුද්ද යනු හුදෙක් විනෝද සැණකෙළියක් නොවේ. එය අපේ ජාතික උරුමයයි. එම උරුමය එහි නියම ස්වරූපයෙන් ආරක්ෂා කර ගනිමින් මතු පරපුරට දායාද කිරීම අප කාගේත් ජාතික වගකීමකි. මෙවර 2026 සිංහල අවුරුදු සමයේදීවත්, විකෘති අනුකරණයන්ගෙන් මිදී හෙළ සිරිතට විරිතට මුල් තැන දෙමින් අභිමානවත් ජාතියක් ලෙස නැගී සිටීමට අදිටන් කර ගනිමු.
තරිඳු මාධව සඳරුවන්
තරුණ කටයුතු ලේකම්
ගැමුණු පරපුර ජාතික ව්යාපාරය
