අවුරුදු සමයේ රථවාහන තදබදය හා අනතුරු අවම කිරීමට දැඩි ක්රියාමාර්ග ගන්නා අතර මාර්ග නීති උල්ලංඝනය කරන කිසිවකුටත් සමාවක් නොලැබෙන බව පොලීසිය පවසයි.
උදාවන උත්සව සමය වෙනුවෙන් නගරවල රථවාහන තදබදය පාලනය කිරීම සහ මාර්ග අනතුරු අවම කිරීම සඳහා විශේෂ රථවාහන සැලැස්මක් සහ ආරක්ෂක වැඩපිළිවෙළක් ක්රියාත්මක කරන බව රථවාහන පාලන හා මාර්ග ආරක්ෂක දිසාව භාර නියෝජ්ය පොලිස්පති ඩබ්.පී.ජේ. සේනාධීර මහතා පවසයි.
මේ වෙනුවෙන් දිවයින පුරා රථවාහන පොලිස් නිලධාරීන් 8,000කට ආසන්න පිරිසක් රාජකාරි සඳහා යොදවා ඇති බව ඒ මහතා අවධාරණය කළේය. උත්සව සමයේ භාණ්ඩ මිලදී ගැනීම සඳහා ජනතාව නගරවලට විශාල වශයෙන් රොක් වීම නිසා ඇති වන තදබදය පාලනය කිරීමට සියලුම පොලිස් ස්ථානාධිපතිවරුන්ට උපදෙස් දී ඇත. විශේෂයෙන්ම බහුවිධ වෙළෙඳ මධ්යස්ථාන සහ රෙදිපිළි අලෙවිසල් ආශ්රිතව රථවාහන නැවැත්වීමේ පහසුකම් (Parking) ප්රමාණවත් නොවීම ප්රධාන ගැටලුවක් වී ඇති බව නියෝජ්ය පොලිස්පතිවරයා පෙන්වා දුන්නේය.
මේ හේතුවෙන් පාරිභෝගිකයන් තම වාහන ප්රධාන මාර්ගවල හෝ අතුරු මාර්ගවල නැවැත්වීම නිසා දැඩි තදබදයක් ඇති වේ. අදාළ වෙළෙඳ ආයතන හිමිකරුවන් තම පාරිභෝගිකයන් සඳහා රථවාහන නැවැත්වීමේ පහසුකම් සැලසීමට වගබලා ගත යුතු බව ද ඔහු පැවසීය.
මේ සම්බන්ධයෙන් තලාහේන ප්රදේශයේ මෑතකදී විවෘත කළ වෙළෙඳසලක් ආශ්රිතව ඇති වූ දැඩි රථවාහන තදබදය පිළිබඳව අධිකරණයට කරුණු වාර්තා කිරීමෙන් පසු, අදාළ වෙළෙඳසලේ රථවාහන නැවැත්වීමේ ගැටලුව විසඳීමට අපොහොසත් වුවහොත් වෙළෙඳසල විවෘතව තබන කාලය සීමා කරන ලෙස අධිකරණය නියෝගකර ඇති බව ද ඒ මහතා අනාවරණය කළේය.
උත්සව සමයේ සිදු වන මාර්ග අනතුරු පිළිබඳව අදහස් දක්වමින් නියෝජ්ය පොලිස්පතිවරයා පැවසුවේ, සවස් කාලයේ සහ රාත්රී 10.00 දක්වා කාලය තුළ අනතුරු බහුලව සිදු වන බවයි. විශේෂයෙන්ම බීමත් රියැදුරන් සහ මත්ද්රව්ය භාවිතකර වාහන පදවන්නන් අත්අඩංගුවට ගැනීමට බ්රෙත්ලයිසර් (Breathalyzers) යන්ත්ර සහ වෛද්ය පරීක්ෂණ මඟින් දැඩි මෙහෙයුම් ක්රියාත්මක කෙරේ.
පසුගියදා සමනලවැව ප්රදේශයේදී පෙරළුණු ඉන්ධන බවුසරයේ රියැදුරා ද ගංජා පානය කර සිටි අයකු බව තහවුරු වී ඇත. එවැනි රියැදුරන්ට කිසිදු සමාවක් නොදෙන බව හෙතෙම පැවසීය. මාර්ගවල අනතුරුදායක ලෙස වාහන පදවන, අධික වේගයෙන් යන සහ මාර්ග නීති උල්ලංඝනය කරන රියැදුරන් පිළිබඳව තොරතුරු, ඡායාරූප හෝ වීඩියෝ දර්ශන පොලීසියට ලබා දීමට විශේෂ WhatsApp අංකයක් හඳුන්වාදී ඇති බව ද නියෝජ්ය පොලිස්පතිවරයා ප්රකාශ කළේය.
සමාජ මාධ්ය හරහා ලැබෙන මෙවැනි දර්ශන පරීක්ෂාකර වරදකරුවන්ට එරෙහිව දැඩිව නීතිය ක්රියාත්මක කරන බව ද ඔහු වැඩිදුරටත් කියා සිටියේය. අධිවේගී මාර්ගවල පවතින තදබදය අවම කරගැනීමට මුදල් ගෙවීමේදී හැකි තාක් ක්රෙඩිට් කාඩ්පත් (Online payment) භාවිත කරන ලෙස ජනතාවගෙන් ඉල්ලා සිටින ලදි. එමෙන්ම, නිදිවැරීම සහ අධික වෙහෙස නිසා සිදු වන අනතුරු වළක්වා ගැනීමට රියැදුරන් අවධානයෙන් සිටිය යුතු බවත්, හික්කඩුව ප්රදේශයේදී රියැදුරාට නින්ද යෑම නිසා කුඩා දරුවකු මියගිය පුවත මෙහිදී මතක් කර දෙන ලදි.
කඩුවෙල ප්රදේශයේ රාජකාරි කරන නිලධාරීන්ගේ පහසුකම් පිළිබඳව සමාජ මාධ්යවල සංසරණය වන වාර්තා අසත්ය බව පැවසූ සේනාධීර මහතා, නිලධාරීන්ගේ සුභසාධනය සඳහා පොලිස්පතිවරයාගේ උපදෙස් මත සියලු පහසුකම් සලසා ඇති බව ද අවධාරණය කළේය.
අන්සතු දේපළ (ඉන්ධන බවුසර් වැනි) අනතුරට පත් වූ අවස්ථාවලදී ඒවා සොරකම් කිරීමට පෙලඹෙන පුද්ගලයන්ට එරෙහිව ද දැඩිව නීතිය ක්රියාත්මක කරන බවත්, මෙවැනි උත්සව සමයක විනීත සහ නීතිගරුක පුරවැසියන් ලෙස කටයුතු කරන ලෙසත් සේනාධීර මහතා ජනතාවගෙන් ඉල්ලා සිටියේය.
රක්ෂණ ශ්රියන්ත
