ගාල්ල වරායට නාවික සැතපුම් හතළිහක් එපිට ශ්රී ලංකා මුහුදු සීමාවට ඔබ්බෙන් ඇති “සමුද්රීය වෙළෙඳ කලාපයේදී” මුහුදුබත් වූ බව සඳහන් ඉරාන නාවික හමුදාවට අයත් IRIS Dena නෞකාවේ සිටි බව කියන 180 දෙනකු අතරින් 32 දෙනකු බේරාගැනීමට ශ්රී ලංකා නාවික හමුදාව ඊයේ (04) සමත් විය.
ඉන්දියන් සාගරයේ ජාත්යන්තර මුහුදු සීමාව තුළ තිබූ ඉරාන යුද නෞකාවකට අෙමරිකාව විසින් ප්රහාර එල්ල කර එය මුහුදුබත් කර ඇති බව අමෙරිකානු රාජ්ය ලේකම් පේට් හෙග්සෙත් මහතා විසින් තහවුරු කර තිබේ. ඒ ජාත්යන්තර මාධ්ය වෙත අදහස් දක්වමිනි.
මෙම ප්රහාරය ජාත්යන්තර මුහුදු සීමාවේ නාවික සැතපුම් 4ක් ඇතුළත දී සිදු කළ බව අමෙරිකානු රාජ්ය ලේකම්වරයා එහිදී පැවසීය. ඉන්දියන් සාගරයේදී අමෙරිකානු මැදිහත්වීමක් (American assets/involvement) හරහා මෙම නෞකාවට ප්රහාර එල්ල කළ බව ද ඔහු සඳහන් කළේය.
මුහුදුබත් වූ මෙම නෞකාවේ සිටි ශ්රී ලංකා නාවික හමුදාව විසින් බේරාගත් පිරිස ප්රතිකාර සඳහා ගාල්ල කරාපිටිය රෝහලට ඇතුළත් කිරීමට අවශ්ය මැදිහත්වීම් සිදුකළ බව විදේශ කටයුතු අමාත්ය විජිත හේරත් මහතා පාර්ලිමේන්තුවේදී ප්රකාශ කළේය.
ශ්රී ලංකා නාවික හමුදාවට හා වෙරළාරක්ෂක දෙපාර්තමේන්තුවට ඊයේ (04) අලුයම 05.08ට පමණ ලැබුණු තොරතුරක් අනුව අනතුරට පත් නෞකාවේ සිටි පිරිස් රෝහල්ගත කිරීම වෙනුවෙන් මැදිහත්වීම් සිදුකළ බව ද අමාත්යවරයා පැවසීය.
අදාළ නෞකාව අනතුරට ලක්ව ඇත්තේ ශ්රී ලංකාවට අයත් මුහුදේ දී නොවන නමුත් ජීවිත බේරාගැනීම වගකීමක් වන බැවින් මෙම මෙහෙයුම සිදුකළ බව විදේශ කටයුතු අමාත්ය විජිත හේරත් මහතා සඳහන් කළේය.
ජාත්යන්තර සම්මුතීන්ට අනුව මේ සම්බන්ධයෙන් කටයුතු කළ බවත් ගුවන් හමුදාව, නාවික හමුදාව යන දෙපාර්ශ්වයම මැදිහත්වී දැඩි ලෙස අනතුරට පත්ව සිටි 32 දෙනෙක් පමණ බේරාගැනීම වෙනුවෙන් මැදිහත් වූ බවත් අමාත්යවරයා පැවසීය.
ඊයේ උදේ 6.00 වන විට මේ වෙනුවෙන් නාවික හමුදාව මැදිහත් වූ අතර පෙරවරු 7.00 වනවිට දෙවන නෞකාවක්ද යැවූ බව අමාත්යවරයා කීය.
මියගිය අයගේ සිරුරු 80ක් පමණ සොයාගෙන ඇති බව ආරක්ෂක ලේකම් එයාර් වයිස් මාර්ෂල් (විශ්රාමික) සම්පත් තුයියකොන්තා පැවැසීය.
කොපමණ පිරිසක් මියගොස් ඇතිද යන්න පැවැසිය හැක්කේ මුදාගැනීමේ මෙහෙයුම අවසන් වීමෙන් පසුව බව ශ්රී ලංකා නාවික හමුදා මාධ්ය ප්රකාශක කමාන්ඩර් බුද්ධික සම්පත් මහතා රජයේ ප්රවෘත්ති දෙපාර්තමේන්තුවේ ඊයේ (04) සවස පැවැති මාධ්ය සාකච්ඡාවේදී සඳහන් කළේය.
“මූලික වශයෙන් අපි බලන්නේ ආපදාවට ලක්වූ යාත්රාවේ ජීවිත ආරක්ෂා කිරීම. ඉන්පසුව තමයි මෙය කුමන ආකාරයකින් සිදුවුණේද යන්න සම්බන්ධයෙන් විමර්ශන සහ තාක්ෂණික වාර්තාවක් ලබාගන්න පුළුවන් වෙන්නේ. අපේ ප්රධාන අරමුණ වෙලා තියෙන්නේ තවත් පිරිස් ආරක්ෂාකාරීව ඉන්නවා නම් ඒ අයව බේරගන්න එක. මෙම නෞකාවේ කොපමණ ප්රමාණයක් ගියාද කියන එක අපිට කියන්න වෙන්නේ ඉදිරියේදීයි” යැයි ද බුද්ධික සම්පත් මහතා පැවැසීය.
නාවික හමුදාව එම ස්ථානයට යන විට නෞකාවක් එම ස්ථානයේ නොතිබුණු බවත් සුළු තෙල් පැල්ලමක් මුහුදේ තිබුණු බවත් ද ඔහු කීය. ශ්රී ලංකා ගුවන් හමුදාවේ යානා මඟින් එය නිරීක්ෂණය ද කර තිබේ. අනතුරට ලක්වූ නැව එම ස්ථානයේ තිබූ බව හඳුනාගනු ලැබුවේ එම තෙල් පැල්ලමෙන් බව ද ඔහු කීය.
මෙම නෞකාවේ ගමන් මඟ ගැන මෙතෙක් කිසිවක් අනාවරණය නොවන අතර කෙලෙස ආපදාවට ලක්වූවාද යන විස්තර ඉදිරි විමර්ශනවලින් පසුව ප්රකාශ කළ හැකි බව ද බුද්ධික සම්පත් මහතා පැවසීය.
මේ අනතුර සිදුවූ ස්ථානය ආශ්රිතව ධීවර ජනතාව දැනුවත් කර ඇති අතර ධීවර ජනතාව හොඳ වගකීමකින් නාවික හමුදාවට සහ ගුවන් හමුදාවට සහය දක්වන බවත් ඔහු කීය.
ඉරාන නාවික හමුදාවට අයත් නෞකාවක් බව පැහැදිලි වුවත් එම නෞකාව කුමන හේතුවකට කුමන දිශාවකට ගමන් කළේද? මෙන්ම කුමන අරමුණකින් ගමන් කළේද යන්න පැහැදිලි තොරතුරු තවම අනාවරණය වී නැති බව ද නාවික හමුදා මාධ්ය ප්රකාශකවරයා කියා සිටියේය.
ශ්රී ලංකා නාවික හමුදාව කලාපයේ සහ ජාත්යන්තර හමුදාවන් සමඟ ඉතාමත්ම මනාව සැලසුම් සහගතව කටයුතු කරනු ලබන බව ද නාවික හමුදා මාධ්ය ප්රකාශකවරයා වැඩිදුරටත් සඳහන් කළේය.
කරාපිටිය රෝහලට ඇතුළත් කළ පිරිස අතරින් එක් අයෙක් පමණක් ආබාධ සහිතව සිටින බවත් සාමාන්ය තත්ත්වයේ 07 දෙනෙක් සිටින බවත් රෝහල් අධ්යක්ෂ විශේෂඥ වෛද්ය එස්.ඩී.යූ.එම්. රංගා මහතා පැවැසීය. සෙසු අයට ඇත්තේ සුළු තුවාල බව ද රෝහල් අධ්යක්ෂවරයා කීය.
රෝහල්ගත කර සිටි පිරිසගේ සුවදුක් විමසා බැලීමට ඉරාන තානාපති කාර්යාලයේ නිලධාරින්ද පැමිණ තිබිණි.
පවතින තත්ත්වය හමුවේ කරාපිටිය රෝහලේ සහ ඒ අවට ආරක්ෂාව තර කිරීමට පොලීසියත්, හමුදාවත් පියවර ගෙන තිබිණි. මුහුදේ පාවෙමින් තිබුණු සිරුරු ගොඩබිමට රැගෙන ඒමට අවශ්ය කටයුතු සිදුවෙමින් පැවැති බව ද ආරංචිමාර්ග සඳහන් කළේය. මුහුදුබත් වූ නෞකාව මීට වසර 11කට පමණ පෙර ඉදිකිරීම් අවසන් කර 2021 වසරේදී ඉරාන නාවික හමුදාව යටතේ අධිකාරිත්වයට පත් කරන ලද එකක් බව සඳහන්ය. මෙම නෞකාව මීටර් 95ක දිගින් යුක්තය. හෙලිකොප්ටර් යානා පවා ගොඩබැස්විය හැකි අති නවීන යුද සහ යුද අභ්යාස පහසුකම් රැසකින් මෙම නෞකාව සමන්විතය. මෙහි බෙල් 212 වර්ගයේ හෙලිකොප්ටර් යානාවක්ද අන්තර්ගතව තිබී ඇත. නෞකාවේ සාමාන්ය කාර්ය මණ්ඩලය 250 දෙනෙකුගෙන් පමණ සමන්විතය.
