සිංහල දෙමළ අලුත් අවුරුද්ද සඳහා ගම්බිම් බලා යන ජනතාවගේ පහසුව වෙනුවෙන් බස් රථ මෙන්ම දුම්රිය විශේෂ සේවා ලබන 09 වෙනිදා සිට ක්රියාත්මක කිරීමට ප්රවාහන අමාත්යාංශය සැලසුම් කර ඇත.
ඒ අනුව අතිරේක බස්රථ 1500ක් යොදවා ඇති බව ලංකා ගමනාගමන මණ්ඩලයේ සභාපති සජීව කන්නන්ගර මහතා ප්රකාශ කළේය.
කොළඹ මධ්යම බස්නැවතුම්පොලේ සිට හැටන්, බදුල්ල, මහනුවර, බණ්ඩාරවෙල, අනුරාධපුර, ත්රිකුණාමලය, යාපනය, හලාවත හා පුත්තලම ආදී ගමනාන්ත රැසකට බස් රථ ධාවනයට සැලසුම් කර ඇත.
අධිවේගී මාර්ගය ආශ්රිතව ද විශේෂ සේවා ක්රියාත්මක වන අතර ගාල්ල සහ මාතර ගමනාන්ත වෙත ප්රමුඛතාව ලබා දී ඇති අතර මීට සමගාමීව දුම්රිය දෙපාර්තමේන්තුව ද ලබන බ්රහස්පතින්දා සිට අලුත් අවුරුදු විශේෂ ප්රවාහන සේවා ආරම්භ කිරීමට මගී අවශ්යතා අනුව දුම්රිය ධාවනයට සැලසුම් කර ඇති බව දුම්රිය සාමාන්යාධිකාරී රවීන්ද්ර පද්මප්රිය මහතා පැවැසීය.
ජාතික ගමනාගමන කොමිෂන් සභාවේ ඉල්ලීම මත ප්රධාන ගමනාන්තවල සිට ධාවනයට එක් කිරීමට බස්නාහිර පළාත් මාර්ගස්ථ මගී ප්රවාහන අධිකාරිය අමතර බස් ඇණියක් සූදානම් කර ඇතැයි එහි සභාපති ගාමිණී ජයසිංහ මහතා සඳහන් කළේය.
උඩරට දුම්රිය මාර්ගයේ දුම්රිය ගමනාගමන කටයුතු අඩාළව පවතින නිසා එයද සැලකිල්ලට ගනිමින් ලංගම මූලිකකරගත් බස් සේවා ක්රියාත්මක කරන බව ප්රවාහන හා මහාමාර්ග නියෝජ්ය අමාත්ය, වෛද්ය ප්රසන්න ගුණසේන මහතා පැවැසීය.
ඉන්ධන අර්බුදය හැකි පමණින් කළමනාකරණය කර ගැනීමට රජය කටයුතු කර තිබෙන බවත් ඒ සඳහා ජනතාව ලබාදෙන සහය අගය කරන බවත් ඒ මහතා එහිදී කීවේය.
පවතින අර්බුදය නිවැරැදිව තේරුම් ගෙන ජනතාව අරපිරිමැස්මෙන් යුතුව ඉන්ධන පරිභෝජනය කරන තත්ත්වයක් පැහැදිලිව පෙනෙන්නට තිබෙන බව ද ගුණසේන මහතා පැවසුවේය.
අලුත් අවුරුදු සමයේ වෙනදා මාර්ගවල දක්නට ලැබෙන වාහන ප්රමාණය අද දකින්නට නොලැබෙන බවත් ජනතාව රජයේ ඉල්ලීමට කන්දී පොදු ප්රවාහන සේවා භාවිතයට වැඩිපුර යොමුව තිබෙන බවත් හෙතෙම අවධාරණය කළේය.
මෙම පසුබිම තුළ පොදු ප්රවාහන සේවා කිසිදු ආකාරයෙන් අඩාළ නොවී පවත්වාගෙන යෑම රජයේ වගකීම බවත්, එය නිවැරදිව තේරුම් ගනිමින් අලුත් අවුරුදු සමයේ විශේෂ බස් සේවා ක්රියාත්මක කිරීමට පියවර ගෙන තිබෙන බවත් ඒ මහතා කීය.
සුභාෂිණී සේනානායක, අසේල කුරුළුවංශ, මධ්යම පළාත් විශේෂ
