විවිධ රෝගී තත්ත්වයන්ට ප්රතිකාර ලබාගැනීම සඳහා රජයේ රෝහල්වලට පැමිණ සිටි රෝගීහු විශාල පිරිසක් රජයේ වෛද්ය නිලධාරීන්ගේ සංගමය ඊයේ (31) ක්රියාත්මක කළ පැය 24 එක් දින වැඩ වර්ජනය හේතුවෙන් අපහසුතාවට පත්ව සිටියහ.
කලින් නොදන්වා එක් වරම පැවැත්වූ මේ වැඩ වර්ජනය හේතුවෙන් තමන්ට නිකරුණේ බස් ගාස්තු වැය කිරීමට මෙන්ම කාලය විනාශ කර ගැනීමටද සිදු වූ බවට රෝගීහු චෝදනා කරති.
රෝගීන් ගැන කිසිදු අනුකම්පාවක් නැතිව සිදු කරන මේ වර්ජන අනුමත කළ නොහැකි බව ද ඔවුහු පවසති.
වර්ජනය ක්රියාත්මක වුවත් හදිසි ප්රතිකාර සහ මාතෘ හා ළමා, වකුගඩු, පිළිකා රෝහල්වල සේවාවන් සාමාන්ය පරිදි සිදු කළත් සාමාන්ය ජනතාවට ප්රතිකාර ගැනීමට නොහැකි වීම නිසා දැඩි දුෂ්කරතාවලට ලක් වූ බවත් රෝගීහු පවසති.
දුරබැහැර ප්රදේශවල සිට පැමිණ ප්රතිකාර නොගෙන යෑමට සිදුවීම කනගාටුදායක බවත් රෝගීන් මෙම ක්රියාවන් නිසා අපහසුතාවට පත් වූ බවත් රෝගීහු පවසති.
වැඩ වර්ජනයන් සිදු නොකර රෝගීන් අපහසුතාවට පත් නොකර කටයුතු කරන්නට වෛද්යවරුන්ට හැකි නම් එය අහිංසක රෝගීන්ට සහනයක් බවත් මහජන මුදල්වලින් ඉගෙනුම ලබා සිදු කරන මේ වැඩ වර්ජන අනුමත කළ නොහැකි බවත් රෝගීහු ප්රකාශ කරති.
බදුල්ල ශික්ෂණ රෝහලෙන් ප්රතිකාර ගැනීම සඳහා පැමිණි රෝගියකු වෛද්ය වැඩ වර්ජනය නිසා දැඩි අපහසුතාවට පත්ව පෝලිමක රැඳී සිටිය දී සිහිසුන්ව ඇද වැටුණු බවට ද වාර්තා වේ.
ඇතැම් රෝගීන්ට වෙනත් දිනයන් ලබාදී ඇති බවත් ආර්ථික අපහසුකම් මැද පැමිණි රෝගීන්ට නැවත දිනයක පැමිණීමට සිදු වීමෙන් අතැති මුදල් ද හිඟ වන බවත් රෝගීහු චෝදනා කරති.
සන්ධ්යා කරුණාරත්න
