සිලි බෑග් සඳහා මිල නියම කිරීමෙන් පසුව සිලි බෑග් භාවිතය සියයට 50කින් අඩු වී ඇතැයි වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන කටයුතු පිළිබඳ ඇමැති වසන්ත සමරසිංහ මහතා පැවසීය.
මීට මාස 6කට පෙර දෛනිකව මිලියන 26 බැගින් එකතු වූ සිලිබෑග් ප්රමාණය මේ වනවිට මිලියන 13ක් දක්වා අඩු වී ඇතැයි ද ඒ මහතා පැවසීය.
ඒ මහතා මෙසේ පැවසුවේ අමාත්යාංශයේ ඊයේ (16) පැවැති මාධ්ය හමුවකට එක් වෙමිනි.
එහිදී වැඩිදුරටත් අදහස් දැක්වූ ඇමැතිවරයා මෙසේ ද පැවසීය.
පාරිභෝගික භාණ්ඩවල ගුණාත්මකභාවය මතයි පාරිභෝගික විශ්වාසය පවතින්නේ. පාරිභෝගික ජනතාවට ගුණාත්මක භාණ්ඩයක් ලබා ගැනීමට තිබෙන අයිතිය ආරක්ෂා කිරීමටයි අධිකාරිය කටයුතු කරන්නේ. ඒ වෙනුවෙන් අධිකාරිය විශාල කාර්යභාරයක් ඉටුකළා. ඒ අතරින් ෂොපින් බෑග් භාවිතය අවම කරන්න මිලක් අය කළා. මෙයට විවේචන ආවත් අද වෙනකොට සුපිරි වෙළඳසල්වල සිට ගමේ කඩේ දක්වා මෙය ක්රියාත්මක කරනවා. මේ නිසා සාමාන්යයෙන් භාවිත කළ ෂොපින් බෑග් ප්රමාණය 50%කින් අඩුවෙලා. ඒ වගේම විකල්ප බෑග් භාවිතයට ඇවිත්. එයයි අපේ උත්සහය වුණේ.
දරුවන්ගේ වතුර බෝතල් හා කෑම පෙට්ටි ගුණාත්මකභාවයෙන් තිබිය යුතු බව අපි නිෂ්පාදකයින්ට කිව්වා. ඒ සදහා අප්රේල් 01 දක්වා මාස 6ක කාලයක් නිෂ්පාදකයින්ට හා ආනයනකරුවන්ට අපි ලබා දුන්නා. 2025 ඔක්තෝම්බර් මස 01 දින මෙයට අදාළ ගැසට් පත්රය අනුව ඉදිරියේදී අපි කටයුතු කරනවා. එහි දියරමය පාන රැගෙන යාමට එක් වරකට වඩා වැඩියෙන් භාවිත කරන වතුර බෝතල් සම්බන්ධයෙන්, ළදරුවන්ට ආහාර ලබාදීමට ප්ලාස්ටික් ද්රව්යවලින් සාදන ලද බෝතල් හා කෑම පෙට්ටි සඳහා පිරිවිතර අපි ඇතුළත් කර තිබෙනවා.
ශ්රී ලංකා ප්රමිති ආයතනයෙන් අනුමත කරන රසායනික ද්රව්යවලට වඩා වැඩියෙන් රසායනික ද්රව්ය තිබෙනවා නම් පාරිභෝගිකයාගේ ආරක්ෂාව වෙනුවෙන් ඒවා වෙළෙඳපොළෙන් ඉවත් කරන්න වගේම පනතට අදාළව නීත්යනුකූලව කටයුතු කරන්නත් පියවර ගන්නවා. ගැබිනි මාතාවන්, දරුවෝ තමයි මේ දේවල් පාවිච්චි කරන්නේ.
ඒ වගේම ඉදිරි දින කිහිපය තුළ පාරිභෝගිකයාගේ ආරක්ෂාව වෙනුවෙන් සැලෝන් නිරීක්ෂණය කරන්නත් තීරණය කර තිබෙනවා. රූපලාවණ්යය නිෂ්පාදනවල තිබිය යුතු බැර ලෝහ ප්රමාණය නිර්දේශ කර තිබෙනවා. සාමාන්යයෙන් ශ්රී ලංකා ප්රමිතිය අනුව කිලෝවකට රසදිය මිලිග්රෑමයයි තියෙන්න පුළුවන්. නමුත් සමහර නිෂ්පාදනවල අධික රසදිය ප්රමාණයක් තිබෙනවා. මේ ප්රමිතීන්වලින් තොරව, සමාජ මාධ්ය භාවිත කරමින් පාරිභෝගිකයා රවටන නිෂ්පාදන විකුණනවා. මෙයින් අනවශ්ය බැරලෝහ ප්රමාණයක් ශරීරයට එනවා. මෙවැනි ප්රමිතියෙන් තොර භාණ්ඩ නිෂ්පාදන කරන අය, විකුණන අයට විශේෂයෙන් සැලෝන් දැනුවත් කරනවා. ඒ වගේම පාසල් දැරියන් මේ සම්බන්ධයෙන් දැනුවත් කරන්න පියවර ගන්නවා. වෙළෙඳපොළේ සාම්පල් ටෙස්ට් කිරීමත් ආරම්භ කරනවා.
ඉදිරි උත්සව සමයේ මිලදී ගැනීම් කරන විට ලහි ලහියේ මිල වැඩි කරමින් අනාරක්ෂිත ප්රමිතියෙන් තොර භාණ්ඩ විකුණනවා. මේ නිසා අපි මාර්තු මස 18 වැනිදා සිට පාරිභෝගික පැමිණිලි සම්බන්ධයෙන් කඩිනම් විමර්ශනවලට යොමු වෙනවා. 1971ට කතා කරලා පැමිණිලි කළ හැකියි. සවස 4.30න් පසුව ලැබෙන පැමිණිලි රෙකෝඩ් කර විමර්ශනයට පියවර ගන්නවා. මේ අතරේ තව දුරටත් පාරිභෝගික ආරක්ෂාව වෙනුවෙන් අදාළ පියවර ගන්නවා.
රන්මලී සෝමසිරි
