අම්බුළුවාව සම්බන්ධයෙන් අවශ්ය සොයාබැලීම් සිදු කිරීමට විශේෂඥ කමිටුවක් පත්කිරීමට පරිසර අමාත්යාංශය සිදු කළ ඒකාබද්ධ නිරීක්ෂණ චාරිකාවෙන් පසු තීන්දු කළ බව කැබිනට් ප්රකාශක, සෞඛ්ය හා ජනමාධ්ය ඇමැති, වෛද්ය නලින්ද ජයතිස්ස මහතා පැවසීය.
රජයේ ප්රවෘත්ති දෙපාර්තමේන්තුවේ ඊයේ (10) පැවති කැබිනට් තීරණ දැනුම්දීමේ මාධ්ය හමුවේදී ඇමැතිවරයා මේ බව කියා සිටියේය.
එම කමිටුවට අදාළ නම් මේ වන තෙක් ඉදිරිපත් කර නොමැති බවත් එම කමිටුව පත්කිරීමෙන් පසු ඔවුන් ලබාදෙන වාර්තා අනුව කටයුතු කරන බවත් හෙතෙම කීවේය.
ඇමැතිවරයා වැඩිදුරටත් මෙසේද පැවැසීය.
“පසුගිය පෙබරවාරි 04 වැනිදා පස්වරුවේ පරිසර ඇමැතිවරයා, මධ්යම පරිසර අධිකාරියේ අධ්යක්ෂ ජනරාල්වරයා, නිලධාරීන්, අදාළ ප්රදේශයේ ප්රාදේශීය ලේකම්වරුන්, පරිසරවේදීන් ඇතුළු කණ්ඩායමක් මේ ක්ෂේත්රයේ චාරිකාවක නිරත වුණා. කේබල් කාර් ව්යාපෘතියට මධ්යම පරිසර අධිකාරිය එදා අනුමැතිය ලබාදෙද්දි ජාතික පාරිසරික පනතේ ප්රතිපාදන උල්ලංඝනය කරලා මහජන අදහස් ලබා ගැනීමට තිබුණ අවස්ථාව නැති කරලා තිබෙනවා. පුවත්පත් දැන්වීම් දාලා මහජනතාවට ඒ සඳහා අවස්ථාව සලසා දී නැහැ. ගැසට් පත්රයේ පළ කරලා නැහැ. එහිදී එවැනි කරුණු කිහිපයකුත් අනාවරණය වුණා.
මේ ප්රදේශයේ අපිට ආවේණික සත්ත්ව හා ශාක ගණනාවක් තිබෙනවා. ඒ වගේම පාරිසරික ඇගයීමේ ක්රියාවලියට වනජීවී එක සම්බන්ධ කරගෙන තිබුණේ නැහැ. තක්සේරු වාර්තාව ලබා ගැනීම වෙනුවට මූලික පාරිසරික අධ්යයන වාර්තාවක් පමණයි ලබාගෙන තිබෙන්නේ. මේ අනුව යම් තාක්ෂණික කරුණු ගණනාවකුත් අනාවරණය වුණා. එම කණ්ඩායම ඉදිරිපත් කරන ලද වාර්තාව පදනම් කරගෙන අමාත්යාංශය විසින් විශේෂඥ කමිටුවක් පත් කිරීමට තමයි යෝජනා කර තිබෙන්නේ. එම කමිටුවේ නම් තාමත් ඉදිරිපත් වෙලා නැහැ. ඉදිරි කටයුතු වෙන්නේ, ඒ විශේෂඥ කමිටුව පත්කර එම වාර්තාවට අනුව කටයුතු කිරීමයි.”
නුවන් කොඩිකාර
