වසර 2019 දී නීති විරෝධිව පොලීසියේ සේවයේ නියුතු නිලධාරීන් හත්සිය හතර දෙනකුගේ විදේශ ගමන් තහනම් කරමින් අයුතු අවහිරයක් කළ බවට අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් අපරාධ පරීක්ෂණ දෙපාර්තමේන්තුවේ හිටපු අධ්යක්ෂ නියෝජ්ය පොලිස්පති වික්රමාරච්චිගෙ තිලකරත්න මහතා රුපියල් ලක්ෂ 10ක ශරීර ඇපයක් මත මුදා හරින ලෙස කොටුව මහේස්ත්රාත් ඉසුරු නෙත්ති කුමාරගේ මහතා ඊයේ (09) නියෝග කළේය.
අගතියට පත් පාර්ශ්වයන්ගෙන් ලද පැමිණිලිවලට අදාළව නාරාහේන්පිට මධ්යම අපරාධ කොට්ඨාසය විසින් සිදු කරන ලද විමර්ශනයන්ට අදාළව අත්අඩංගුවට ගෙන අධිකරණයට ඉදිරිපත් කළ සැකකාර පොලිස් නිලධාරියා සම්බන්ධයෙන් පෙනී සිටි නීතිඥවරුන් සිදු කළ ඉල්ලීම සපකා බැලූ මහේස්ත්රාත්වරයා මෙම නියෝගය සිදු කළේය. 2019 සිදු කරන ලද මෙම ක්රියාව හේතුවෙන් ඇතැම් පොලිස් නිලධාරීන් වින්දිතයන් බවට පත්ව ඇති බව සැකකාර පොලිස් නිලධාරියා ඉදිරිපත් කරමින් නාරාහේන්පිට මධ්යම පොලිස් කොට්ඨාසය අධිකරණයට දන්වා සිටියේය.
2025 වසරේ ලද පැමිණිල්ලක් ප්රකාරව විමර්ශන සිදු කළ බවත් සිද්ධිය සම්බන්ධයෙන් ප්රකාශ 11ක් සටහන් කර ඇති බවත් පොලීසිය අධිකරණයට දන්වා සිටියේය.
මෙහි 2, 6 සහ 7 සාක්ෂිකරුවන් වින්දිතයන් බවට පත්ව ඇති බව අනාවරණය වූවා යැයිද පොලීසිය අධිකරණයට දන්වා සිටියේය. එහිදි මහේස්ත්රාත්වරයා විමසා සිටියේ මෙම නියෝගය අධිකරණය මඟින් ගෙන තිබේද යන්නය.
එහිදී නැති බව පොලීසිය දැනුම් දුන් අවස්ථාවේදී පොලිස් නිලධාරීන් නියෝග ආගමන විගමන දෙපාර්තමේන්තුව ක්රියාත්මක කරන්නේද යන්න විමසා සිටියේය.
මෙම නිලධාරීන්ගේ නම් ආගමන විගමන පද්ධතියට ඇතුළු කරලා යැයි පොලීසිය අධිකරණය හමුවේ කියා සිටියේය.
සැකකාර පොලිස් නිලධාරියා වෙනුවෙන් කරුණු දක්වමින් නීතිඥ ගීත් කරුණාරත්න මහතා ඇතුළු නීතිඥ කණ්ඩායම අධිකරණයට කරුණු දක්වමින් මෙම සිදුවීම සම්බන්ධයෙන් පොලිස්පතිවරයාට යවන ලද ලේඛන අධිකරණයට ඉදිරිපත් කරනු ලැබීය.
2019 වසරේදි පොලිස්පතිවරයාගේ වාචික කරුණු දැක්වීමට අනුව පොලිස්පතිවරයාගේ අවසරයකින් තොරව විදේශගත වීමට අවසර ලබා නොදෙන ලෙසට ලිපියක් ඉදිරිපත් කිරීම පමණක් කළ බවත් එය ආගමන විගමන දෙපාර්තමේන්තුවට යවා නැති බවත් අධිකරණයට දැනුම් දුන්නේය.
එම ලිපිය යවා ඇත්තේ නිශාන්ත සිල්වා නිලධාරියා අවසරයකින් තොරව විදේශ ගත වීම හේතුවෙන් තවත් නිලධාරීන් විදේශගත වන බවට ලද තොරතුරු මත බව කී නීතිඥවරයා කටුනායක බණ්ඩාරනායක ගුවන්තොටුපළ පරිශ්රෙය් සහකාර පොලිස් අධිකාරිවරයාට එම ලිපිය යොමු කර ඇති බවත් මහේස්ත්රාත්වරයා හමුවේ කියා සිටියේය.
එමෙන්ම තම සේවාදායකයා විශ්රාමික වයස්ගත පුද්ගලයෙක් බවත් ස්නායු ආබාධයක් සඳහා ප්රතිකාර ලබමින් සිටින බවත් පවසමින් නීතිඥවරයා සුදුසු ඇපයක් මත මුදාහරින ලෙස අධිකරණයෙන් ඉල්ලා සිටියේය. සැකකාර නිලධාරියා වෙනුවෙන් ඉදිරිපත් කළ ලේඛන සලකා බැලූ මහේස්ත්රාත්වරයා එම ලේඛන පිළිගන්නේද යන්න පොලීසියෙන් විමසා සිටි අතර එම ලේඛන පිළිගන්නේ නම් අපරාධමය වරදක් අනාවරණය නොවන බව පවසමින් ඇප මත මුදා හැරියේය.
එසේම සිද්ධිය සම්බන්ධයෙන් විමර්ශන කර අපරාධමය වරදක් සනාථ වන්නේ නම් පමණක් නඩු පවරන ලෙසත් එසේ නැතහොත් මුදා හරින ලෙසත් පොලීසියට නියෝග කළේය.
සුභාෂිණී සේනානායක
