යම් රියැදුරකු මත්ද්රව්ය භාවිත කර බස් රථය ධාවනය කරන බවට හෝ කොන්දොස්තරවරයකු මත්ද්රව්ය භාවිත කර ඇති බවට මේ දිනවල සිදු කරන හදිසි මත්ද්රව්ය පරීක්ෂාවලදී හෙළි වුවහොත් බස් රථයේ හිමිකරුගේ මාර්ග බලපත්රය අහෝසි කරන බව ප්රවාහන, මහාමාර්ග සහ නාගරික සංවර්ධන ඇමැති බිමල් රත්නායක මහතා පැවැසීය. මේ නිසා කිසිදු හේතුවක් මත මත්ද්රව්යවලට ඇබ්බැහි වූ රියැදුරන් සේවයට යොදා නොගන්නැයි බස් රථ හිමිකරුවන්ට දැනුම් දුන් ඒ මහතා එසේ අහෝසි වන මාර්ග බලපත්ර කිසිදු හේතුවක් මත යළි ලබාදීම ගැන විමසා බැලිමක්වත් සිදු නොකරන බව ද කීවේය.
මාතර දිස්ත්රික් ලේකම් කාර්යාලයේ පැවැති රැස්වීමකට එක් වෙමින් ඊයේ (09) ඒ මහතා මේ බව පැවසුවේය. තමන්ගේ බස් රථයේ රියැදුරා හෝ කොන්දොස්තරවරයා මත්ද්රව්ය භාවිත කරනවාද නැද්ද යන්න බස් හිමියන් දන්නවා. කිසිම විටෙක එවැනි රියැදුරන් යොදා ගන්න එපා. බස් හිමියන්ට මේ රියැදුරන් හා කොන්දොස්තරවරුන් ගැන වගකීමක් තිබෙනවා. එවැනි රියැදුරන් යොදා ගතහොත් මාර්ග බලපත්රය අහෝසි විය හැකියි.
අපි කිසිසේත්ම විශ්වාස කරන්නේ නෑ බස් රථයේ හිමිකරුවා නොදැන මත්ද්රව්ය භාවිත කරන බස්රථ රියැදුරු හෝ කොන්දොස්තරවරයකු ඉන්න පුළුවන් කියලා.
ඒ නිසා ඔබේ බලපත්රය අහිමි කරගන්නවා වෙනුවට වගකීමෙන් මත්ද්රව්යවලට ඇබ්බැහි නොවුණු අය තමන්ගේ ව්යාපාරයට යොදවා ගන්න යැයිද හෙතෙම කීවේය.
සුභාෂිණී සේනානායක
