ශ්රී ලංකා රේගුව සඳහා 2026 ජනවාරි මාසයේ දී ලබාදී තිබූ ආදායම් ඉලක්කය වූ රුපියල් බිලියන 160.2 අගය ඉක්මවමින් සති තුනක් තුළ රුපියල් බිලියන 175.4ක ආදායමක් රැස් කරගැනීමට සමත්ව තිබේ.
2026 ජාත්යන්තර රේගු දිනය යෙදී තිබූ ඊයේ (26) දිනයේ මෙම ආදායම වාර්තා වී තිබිණි. 2026 ජනවාරි මාසය සඳහා රේගුව වෙත ලබාදී තිබූ ආදායම් ඉලක්කය රුපියල් බිලියන 160.2කි. ඒ අනුව මෙම ඉලක්කයට වඩා රුපියල් බිලියන 15.2ක් වාර්තා කිරීමට රේගුව සමත්ව තිබේ.
එම මාසය සඳහා අපේක්ෂිත රුපියල් බිලියන 160.2ක ඉලක්කයට වඩා 9.5%ක වර්ධනයක් බව ද ශ්රී ලංකා රේගුව පෙන්වා දෙයි.
2025 වසරේ දී ශ්රී ලංකා රේගුව එහි ඉතිහාසය පුරා වාර්තා කළ වැඩිම වාර්ෂික ආදායම රැස් කිරීමට සමත් වූ අතර, එය රුපියල් බිලියන 2,551කි. 2025 වසර සඳහා ලබා දී තිබූ ආදායම් ඉලක්කය රුපියල් බිලියන 2,241කි එම ආදායම් ඉලක්කය සපුරාලමින් මෙම ඉතිහාසයේ වැඩිම ආදායම රැස් කරගත් රේගුව 2024 වසරේ හිමිකරගෙන තිබූ සමස්ත ආදායම රුපියල් බිලියන 1,553කි. 2024 ආදායම 2025 වසර හා සැසඳීමේදී එය සියයට 64.2ක වර්ධනයක් බව ද රේගු දත්ත පෙන්වා දෙයි.
ශ්රී ලංකා රේගුවට 2026 වසර සඳහා ලබාදී ඇති ආදායම් ඉලක්කය රුපියල් බිලියන 2,207කි. මෙම වසරේ අපගේ ප්රධාන උපායමාර්ගික අරමුණ වන්නේ රජයේ ප්රතිපත්තියට අනුකූලව ඉතිරිව ඇති සියලුම අංශ ආවරණය වන පරිදි ක්රියා පටිපාටි සම්පූර්ණයෙන් ඩිජිටල්කරණය කිරීම, වේගවත් සේවා සැපයීම, වැඩි විනිවිදභාවයක්, වැඩිදියුණු කළ කාර්යක්ෂමතාව සහ මුහුණට මුහුණ අන්තර්ක්රියා අඩු කිරීම සහතික කිරීම බව රේගු අධ්යක්ෂ ජනරාල් සීවලී අරුක්ගොඩ මහතා පැවසීය. එමෙන්ම රේගු නීති තදින් ක්රියාත්මක කිරීම, භාණ්ඩ තක්සේරු කිරීමේ ක්රමවේද වැඩිදියුණු කිරීම සහ වසර කිහිපයක පසුබෑමකට පසු ආනයන ප්රමාණය නැවත ඉහළ යාම ජනවාරි මාසයේ මෙම ආදායම් වර්ධනයට හේතු වූ බව ද හෙතෙම කියා සිටියේය. භාණ්ඩවල වටිනාකම අඩු කර පෙන්වීම සහ වැරදි ලෙස භාණ්ඩ ප්රකාශ කිරීම් පිළිබඳ දැඩි ලෙස නිරීක්ෂණය කිරීම හරහා රජයේ ආදායම තවදුරටත් ශක්තිමත් වී ඇතැයිද හෙතෙම පෙන්වා දුන්නේය.
සුභාෂිණී සේනානායක
