ඔටිසම් වැනි ස්නායු රෝගවලින් පෙළෙන දරුවන් රැක බලා ගැනීමේ දැනට තිබෙන වැඩපිළිවෙළට අමතරව විශේෂ වැඩපිළිවෙළක් සැලසුම් කරන බව සෞඛ්ය හා ජනමාධ්ය ඇමැති වෛද්ය නලින්ද ජයතිස්ස මහතා පාර්ලිමේන්තුවේ දී ඊයේ (08) පැවසීය.
ප්රතිකාරයෙන් ඔබ්බට ගොස් දරුවන් රැක බලා ගැනීමේ වැඩපිළිවෙළ සෞඛ්ය අමාත්යාංශයට පමණක් නොව තවත් අමාත්යාංශය කිහිපයක සම්බන්ධීකරණයෙන් ක්රියාවට නැංවිය යුතු බවත් ග්රාමීය සංවර්ධන අමාත්යාංශය, ළමා හා කාන්තා කටයුතු අමාත්යාංශය යනාදී අමාත්යාංශ මේ සඳහා ඒකාබද්ධ විය යුතු බවත් ඇමැතිවරයා පැවසීය.
මේ ගැටලුව කෙරෙහි ජනාධිපතිවරයාගේ ද අවධානය යොමුව ඇතැයි ඇමැතිවරයා ප්රකාශ කළේය. නව ප්රජාතන්ත්රවාදී පෙරමුණේ මහනුවර දිස්ත්රික් මන්ත්රී අනුරාධ ජයරත්න මහතා වාචිකව ඇසූ ප්රශ්නයට පිළිතුරු දෙමින් ඒ මහතා මේ බව කියා සිටියේය.
ඔටිසම් වැනි රෝගවලින් පීඩා විඳින දරුවන් කල් ඇතිව හඳුනාගෙන ඒ සඳහා චිකිත්සක ප්රතිකාර ලබා දීමේ වැඩසටහන ලෙස අන්තර්කරණ මුල් ළමාවිය සංවර්ධන වැඩසටහන ක්රියාවට නංවන බව ද ඇමැතිවරයා කීය.ඔටිසම් ප්රතිකාර ලබා දීම සඳහා 2025 වසරේදී රුපියල් මිලියන 200ක මුදලක් ද, 2026 වසරේදී තවත් රුපියල් මිලියන 100ක මුදලක් ද වෙන් කර ඇති බවත් රට පුරා රෝහල් 20ක මේ රෝගයට ප්රතිකාර ලබා දීම සිදු කරන බවත් ඇමැතිවරයා පැවසීය.
ඔටිසම් ඇතුළු ස්නායු රෝගවලින් පෙළෙන දරුවන් රැක බලා ගැනීමට විශේෂ වැඩපිළිවෙළක් ක්රියාත්මක විය යුතු අතර ප්රතිකාර කිරීම පමණක්ම නොව මේ දරුවන් රැකබලා ගැනීම සඳහා විශේෂ වැඩපිළිවෙළක් ලෙස දරුවන් රැක බලා ගන්නා සුරැකුම් මධ්යස්ථාන වැඩි කිරීමට රජය පියවර ගන්නා බව ද ඇමැතිවරයා ප්රකාශ කළේය. කොළඹ රිජ්වේ ආර්යා ළමා රෝහලේ ඔටිසම් ප්රතිකාර මධ්යස්ථානයක් ආරම්භ කිරීමේ මූලික කටයුතු ආරම්භ කරන බවත් ඒ සඳහා ප්රතිපාදන වෙන් කර ඇති බවත් ඇමැතිවරයා පැවසීය.ඔටිසම් වැනි දරුවන් සඳහා සෞඛ්ය අමාත්යාංශයේ විශේෂ සෞඛ්ය ඒකකයක් ආරම්භ කිරීමට පියවර ගන්නා බව ද ඇමැතිවරයා පැවසීය.
ස්වර්ණා විජේකෝන්, මහින්ද අලුත්ගෙදර, සන්ධ්යා කරුණාරත්න
