තඹරවිල ප්රදේශයේ කාන්තාවක් විසින් සිය නිවෙසේ අලෙවි කළ නීති විරෝධී මත්පැන් පානය කළ වෙන්නප්පුව, වයික්කාල හා තඹරවිල ප්රදේශවල පුද්ගලයන් 5 දෙනකු මියගොස් තවත් තිදෙනකු මීගමුව රෝහලට ඇතුළත් කර තිබේ.
ඊයේ (06) උදෑසන මේ සිද්ධිය සිදුව තිබෙන අතර මෙසේ මිය ගොස් ඇත්තේ ජුඩ් ප්රශාත් නිශාන්ත (58), වසන්ත රණසිංහ (53), කෝවිල් සෙල්වම් (28), රංජිත් ප්රනාන්දු (60), කේ.එච්.ජයන්ත (56) යන අයවලුළුන්ය. ඔවුන් වයික්කාල තඹරවිල, ඔතානෙගම අනුරාධපුර, ඩයනගම හැටන්, පැල්මඬුල්ල රත්නපුර, මාපලගම ප්රදේශවල පදිංචිකරුවන් බවට හඳුනාගෙන ඇත.
ඉකුත් 04දා පස්වරුවේ මෙම පිරිස එම ප්රදේශයේම කසිප්පු අලෙවි කළ කාන්තාවකගෙන් කසිප්පු මිලදීගෙන පානය කර ඇති බව අනාවරණය කරගෙන තිබේ. ඉන් අනතුරුව මෙම කසිප්පු පානය කළ අයට කිසියම් රෝගී තත්වයක් ඇතිවීම හේතුවෙන් ප්රතිකාර ලබාගෙන ඇති බව සඳහන් වේ.
පසුව ඊයේ (06) දින උදෑසන පෙරවරුවේ මෙම පිරිසගෙන් තිදෙනෙක් ඔවුන් නවාතැන්ගෙන සිටි ස්ථානවල මියගොස් සිටියදී සිරුරු හමුවී තිබේ.
මේ අතර කසිප්පු පානය කර අසාධ්ය තත්ත්වයේ පසුවූ දෙදෙනෙක් මාරවිල මූලික රෝහලට ඇතුළත් කර ඇති අතර රෝහල්ගත කර සිටියදී මියගොස් ඇති බව පවසයි. මේ අතර කසිප්පු පානය කළ තවත් තිදෙනෙක් මීගමුව මහ රෝහලට ඇතුළත් කර ඇත.
මේ පිරිසට කසිප්පු පැකට් අලෙවි කළ බව කියන තඹරවිල ප්රදේශයේ පදිංචි 65 හැවිරිදි කාන්තාවක් වෙන්නප්පුව මූලස්ථාන පොලීසිය විසින් අත්අඩංගුවට ගෙන ඇත. ඇය ඉතාමත් සූක්ෂ්ම අන්දමින් කසිප්පු පැකට් කර රාත්රී කාලයේදී තඹරවිල ප්රදේශයේ ඇයගේ නිවස ඉදිරිපිට මාර්ගයේ තබා විකුණා ඇති බව පොලීසිය කියයි.
මෙම මියගිය සහ රෝහල්ගත කර සිටින අයගෙන් බහුතරයක් පිට පළාත්වලින් පැමිණ එම ප්රදේශයේ ව්යාපාරික ස්ථානවල නැවතී සේවය කරන අය වෙති.
මරණ සම්බන්ධයෙන් මාරවිල අතිරේක මහේස්ත්රාත්වරයා විසින් සිද්ධිය වූ ස්ථානයට පැමිණ ස්ථානීය පරීක්ෂණය සිදුකර සිරුර පශ්චාත් මරණ පරීක්ෂණ සිදුකිරීමට රෝහලට යවන ලෙස පොලීසියට නියෝග කළේය. හලාවත කොට්ඨාස භාර ජ්යෙෂ්ඨ පොලිස් අධිකාරි රොහාන් පෙරේරා මහතාගේ අධීක්ෂණයෙන් වෙන්නප්පුව සහකාර පොලිස් අධිකාරි අසේල පුල්වංශ මහතාගේ මූලිකත්වයෙන් මූලස්ථාන ප්රධාන පොලිස් පරීක්ෂක තිළිණ හෙට්ටිආරච්චි මහතා ඇතුළු නිලධාරීන් කණ්ඩායම සිද්ධිය සම්බන්ධව පුළුල් පරීක්ෂණයක් සිදු කරයි.
මාරවිල සමූහ – මිහිර විජේසේකර
