පසුගිය දිනයන්හි ඇති වූ ස්වාභාවික ආපදා තත්ත්වයට මුහුණදීම සඳහා හදිසි ආපදා නීතිය තවත් මසකින් දීර්ඝ කිරීමට පියවර ගන්නා බව අග්රාමාත්ය, අධ්යාපන, උසස් අධ්යාපන හා වෘත්තීය අධ්යාපන ඇමැති ආචාර්ය හරිනි අමරසූරිය මෙණෙවිය පාර්ලිමේන්තුවේ දී ඊයේ (06) පැවසුවාය.
මෙම හදිසි නීතිය දීර්ඝ කරනුයේ මෙම ස්වාභාවික ආපදාවට මුහුණදීමට පමණක්ම වන බවත් මෙම නීතිය වෙනත් කිසිදු අවශ්යතාවකට භාවිත නොකරන බවත් අග්රාමාත්යවරිය ප්රකාශ කළාය.
හදිසි ආපදා නීතිය තවත් මසකින් දීර්ඝ කර ගැනීම සඳහා වූ විවාදයට එක්වෙමින් අගමැතිවරිය මේ බව කියා සිටියාය.
අගමැතිවරිය මෙසේද පැවසුවාය.
“දිට්වා සුළි කුණාටුව නිසා විශාල හානියක් සිදු වුණා. මීට පෙර නුදුටු අන්දමේ බලපෑමක් මෙමඟින් අපට අත්විඳීමට වුණා. රජය ප්රතිචාර දක්වමින් මේ ආපදාවේ බරපතළකම තේරුම් ගෙන ඉදිරි කටයුතු සිදු කරමින් තිබෙනවා. මේ දරුණු ආපදා තත්ත්වයට මුහුණදීම සඳහා මහජන ආරක්ෂක පනතේ විධිවිධාන යටතේ අතිවිශේෂ ගැසට් එකකින් හදිසි තත්වයක් ප්රකාශයට පත් කිරීමට ජනාධිපතිතුමා කටයුතු කළා. ආපදා කළමනාකරණ කවුන්සිලය රැස් කළ අවස්ථාවේදීත් විපක්ෂයේ මන්ත්රීවරුනුත් හදිසි ආපදා තත්වයක් ප්රකාශයට පත් කරන ලෙසට ඉල්ලීම් කළා. මේ හදිසි තත්වය තවත් මාසයක් දිගු කිරීම සඳහා මේ මෝෂන් එක අද ඉදිරිපත් කරනවා. මේ ආපදාව නිසා හානියට පත් වූ ජනතාව තවමත් කඳවුරු තුළ සිටිනවා. මේ වන විට සුරක්ෂිත මධ්යස්ථාන 225ක පවුල් 6592ක් සිටිනවා. පූර්ණ නිවාස හානි 6037ක් සිදු වුණා. අර්ධ නිවාස හානි ලක්ෂයකයට වඩා සිදුව තිබෙනවා. ඇතැම් පිරිසක් තමන්ගේ ඥාතීන්, හිත මිත්රාදීන්ගේ නිවාස තුළ සිටිනවා. සුරක්ෂා මධ්යස්ථානවල සිටින පිරිසට වඩා වැඩි පිරිසක් ඥාති හිතමිත්රාදීන්ගේ නිවෙස් තුළ සිටිනවා. මේ ආපදා තත්ත්වය තවමත් සාමාන්ය තත්ත්වයට පත්වෙලා නැති බව මෙයින් පැහැදිලි වෙනවා. ආපදාවට පත් වූ පුද්ගලයන් සඳහා සේවාවන් අඛණ්ඩව පවත්වාගෙන යාම සිදු විය යුතුයි. ඒ සඳහා මේ හදිසි තත්වය දීර්ඝ කර ගන්න සිදු වෙනවා. මේ නීතිය දීර්ඝ කර ගැනීමට අපි කටයුතු කරන්නේ හදිසි අවස්ථාව තුළ ආපදා තත්වය කළමනාකරණය කිරීමට මිස වෙනත් හේතුවක් නිසා නොවන බව අවධාරණය කරනවා.”
