රටේ අනාගත පරපුර විෂ මත්ද්රව්ය උවදුරෙන් මුදා ගැනීමට සියලු දෙනා වගකීම් ඉටු කරමුයැයි ජනාධිපති අනුර කුමාර දිසානායක මහතා පැවසීය.
ජනාධිපති අනුර කුමාර දිසානායක මහතා මේ බව සඳහන් කළේ විෂ මත්ද්රව්ය උවදුර මෙරටින් තුරන් කිරීම සඳහා ගොඩනඟන ලද “රටම එකට” ජාතික මෙහෙයුම් සභාවේ තෙවන සැසිය ත්රෛනිකායික මහා සංඝරත්නය ඇතුළු ආගමික නායකයන්ගේ සහභාගීත්වයෙන් ජනාධිපති කාර්යාලයේදී ඊයේ (06) පෙරවරුවේ රැස් වූ අවස්ථාවට එක් වෙමිනි.
රටේ භෞතික සංවර්ධනය මෙන්ම සමාජයේ යහපැවැත්ම සහ ස්ථාවරභාවයද ඉතා වැදගත් බවත්, ජාතික ව්යසනයක් බවට පත්ව ඇති විෂ මත්ද්රව්ය උවදුර මෙරටින් තුරන් කරමින් රටේ අනාගත පරපුර මේ ව්යසනයෙන් මුදා ගැනීමට සියලුදෙනා වගකීම් ඉටු කළයුතු බවත් ජනාධිපති අනුර කුමාර දිසානායක මහතා අවධාරණය කළේය.
දිවයින පුරා මත්ද්රව්ය සැපයුම අඩාළ කිරීම, වැටලීම් පුළුල් කිරීම, ඇබ්බැහිවූවන් පුනරුත්ථාපනය, මත්ද්රව්ය භාවිතය වැළැක්වීම අරමුණු කරගත් නිවාරණ වැඩසටහන් ක්රියාත්මක කිරීම සහ මත්ද්රව්යවලට එරෙහිව ප්රජාව සවිබල ගැන්වීම යන බහුවිධ ප්රවේශ මඟින් රටේ ව්යාප්තව පවතින මත්ද්රව්ය උවදුර මුලිනුපුටා දැමීම ඉලක්ක කර ගනිමින් “විෂ මතින් තොර රටක් – සතුට පිරි හෙටක්” තේමාව යටතේ “ඉවත් වෙනු – රටම එකට” ජාතික මෙහෙයුම ක්රියාත්මක කර තිබේ.
මත්ද්රව්ය ජාවාරම්කරුවන් සහ බෙදා හරින්නන්ට එරෙහිව දැවැන්ත සමාජ බලපෑමක් සහ පීඩනයක් ගොඩනැඟීමටත්, විෂ මත්ද්රව්ය භාවිත කරන්නන් පුනරුත්ථාපනය සඳහාත් රජය, ආරක්ෂක අංශ, සිවිල් සංවිධාන සහ සියලු පුරවැසියන් ඒකාබද්ධ වූ ජාතික පෙරමුණක් ලෙස මෙය ක්රියාත්මක වේ.
විෂ මත්ද්රව්යවලට අදාළව මේ වන විට සිදු කෙරෙන වැටලීම්, අත්අඩංගුවට ගැනීම් සහ පුනරුත්ථාපන ක්රියාවලියේ ප්රගතිය මෙහිදී පුළුල් ලෙස සාකච්ඡාවට ලක් කෙරුණු අතර, ඊට කැප වී කටයුතු කරන සියලු ආයතන, නිලධාරීන් සහ ජනතාවට ජනාධිපතිවරයා සිය ස්තූතිය පළ කළේය.
2025.01.01 සිට 2026.01.05 දක්වා කාලයේ, හෙරොයින් 1821.174kgක්, අයිස් 3865.710kgක්, ගංජා 17189.377kgක්, කොකේන් 38.958kgක්, මත්පෙති සහ මත් කරල් 4,049,569ක් අත්අඩංගුවට ගෙන තිබෙන බව මෙහිදී අනාවරණය කෙරිණි. පසුගිය සාකච්ඡාවේදී තීරණය කළ පරිදි අත්අඩංගුවට ගත් මත්ද්රව්ය තොග කඩිනමින් විනාශ කිරීම සම්බන්ධයෙන් නව නීති සකස් කිරීමේ කටයුතුවල ප්රගතිය ද මෙහිදී කමිටුවේ අවධානයට යොමු වූ අතර, එම කටයුතු කඩිනම් කරන ලෙස ජනාධිපතිවරයා අදාළ අංශවලට උපදෙස් දුන්නේය. එමෙන්ම, දැනට අත්අඩංගුවට ගෙන තිබෙන මත්ද්රව්ය තොග විනාශ කිරීමේ ප්රගතිය පිළිබඳව ද මෙහිදී සාකච්ඡාවට බඳුන් කෙරිණි.
මත්ද්රව්යවලට ඇබ්බැහිවූවන්ගේ සමාජයීය තොරතුරු හඳුනා ගැනීමේ අවශ්යතාව සහ ඊට අදාළ දත්ත එක්රැස් කිරීම වෙනුවෙන් සමීක්ෂණයක් සිදු කිරීම පිළිබඳව ද සාකච්ඡා විය.
මේ ජාතික වැඩසටහන පුළුල්ව ඉදිරියට ක්රියාත්මක කිරීම වෙනුවෙන් අධ්යාපන ආයතන, රාජ්ය ආයතන, ස්වේච්ඡා සංවිධාන සහ කලා සංවිධාන ඇතුළු සියලු පාර්ශ්ව ඒකාබද්ධ කර ගත් ශක්තිමත් යන්ත්රණයක් සකස් කිරීම පිළිබඳව ද සාකච්ඡා කෙරිණි.
එමෙන්ම, ගම සහ ආගමික සිද්ධස්ථාන අතර ඇති සබැඳියාව භාවිතයට ගනිමින් ආගමික නායකයන්ගේ දායකත්වය ඇතිව ජනතාව දැනුවත් කිරීමේ වැඩසටහන් ක්රියාත්මක කිරීම පිළිබඳව ද මෙහිදී සාකච්ඡා විය.
මල්වතු පාර්ශ්වයේ අනුනායක නියංගොඩ විජිතසිරි, අස්ගිරි පාර්ශ්වයේ අනුනායක නාරම්පනාවේ ආනන්ද, රාමඤ්ඤ මහා නිකායේ අනුනායක වලේබොඩ ගුණසිරි, කුප්පියාවත්තේ බෝධානන්ද යන හිමිවරුන් ප්රමුඛ මහා සංඝරත්නයද, නිශාන්ත ප්රනාන්දු පියතුමා, ශ්රී වේලු සුරේෂ් ෂර්මා කුරුක්කල්තුමා, මුත්තුසාමී අලගේසන් කුරුක්කල්තුමා, ෂෙයික් මොහොමඩ් අර්ක්රම් නූරාමිත් මවුලවිතුමා, පූජක ප්රසාදීන් වහන්සේද, මහජන ආරක්ෂක සහ පාර්ලිමේන්තු කටයුතු ඇමැති ආනන්ද විජේපාල, ජනාධිපති ලේකම් ආචාර්ය නන්දික සනත් කුමානායක, ජනාධිපති ජ්යෙෂ්ඨ අතිරේක ලේකම් රෝෂන් ගමගේ, ආරක්ෂක අමාත්යාංශයේ ලේකම් විශ්රාමික එයාර් වයිස් මාර්ෂල් සම්පත් තුයියකොන්තා මහත්වරුන් ඇතුළු පිරිසක් මේ අවස්ථාවට එක්ව සිටියහ.
උපාලි කරුණාරත්න
