ඉතිහාසයේ වැඩිම ආදායම් මට්ටම වාර්තා කරමින් පසුගිය 2025 වසරේ දී සංචාරක ව්යාපාරයෙන් සහ විදෙස් ප්රේෂණවලින් රුපියල් කෝටි 330,000ක (අමෙරිකානු ඩොලර් බිලියන 11) ආදායමක් උපයා ගැනීමට ශ්රී ලංකාව සමත්ව තිබේ. ඒ අනුව අමෙරිකානු ඩොලර් බිලියන 7.8ක විදෙස් ප්රේෂණ මෙරටට ලැබී තිබෙන අතර සංචාරක ව්යාපාරයෙන් උපයා තිබෙන ආදායම අමෙරිකානු ඩොලර් බිලියන 3.2ක් වේ. විදේශ කටයුතු අමාත්යාංශ ශ්රවණාගාරයේදී ඊයේ (05) පෙරවරුවේ පැවැති විශේෂ ප්රවෘත්ති සාකච්ඡාවට එක්වෙමින් විදේශ කටයුතු, විදේශ රැකියා සහ සංචාරක ඇමැති විජිත හේරත් මහතා පැවසුවේ පසුගිය 2025 වසරේදී මේ රටට විදෙස් සංචාරකයන් 2,362,000ක් පමණ පැමිණ තිබෙන බවයි.
එහිදී වැඩිදුරටත් අදහස් පළකළ ඇමැතිවරයා,
“විදේශ කටයුතු අමාත්යාංශය තුළ කටයුතු කිරීමේදී පසුගිය 2025 වසරේදී රාජ්ය තාන්ත්රික මට්ටමින් අවබෝධතා ගිවිසුම්, ද්විපාර්ශ්වික ගිවිසුම් අත්සන් කිරීම මෙන්ම වෙළෙඳ සබඳතා තවදුරටත් ශක්තිමත් කරගනිමින් ජයග්රහණ රැසක් ළඟා කරගන්න අවස්ථාව ලැබුණා. ඒ වගේම ශ්රී ලංකාව ලෝකය තුළ ඔසවා තබන්න හැකියාව ලැබී තිබෙනවා. පසුගිය 2019 වර්ෂයෙන් පසුව මේ රටේ පැවැති සංචාරක අර්බුදය අවසන් කොට ඉලක්කසහගත ගමනක් යමින් පසුගිය 2025 වසරේදී මෙරට ඉතිහාසයේ වැඩිම සංචාරකයන් පිරිසක් පැමිණි වර්ෂය ලෙස ඉතිහාසයට එක්වෙනවා. මෙරට සංචාරක ව්යාපාරය දියුණු කරන්න අවශ්ය ක්රියාමාර්ග ගෙන තිබෙනවා. ඒ හේතුවෙන් පසුගිය 2025 වසරේ දී මේ රටට විදෙස් සංචාරකයන් 2,362,000ක් පමණ පැමිණ තිබෙනවා. දිට්වා සුළි කුණාටුවත් සමඟ සංචාරක ව්යාපාරයේ අවිනිශ්චිත තත්ත්වයක් නිර්මාණය වුවත් ඒ තත්ත්වය ගැටලුවකින් තොරව සමනය කරගන්න අපට හැකියාව ලැබුණා. පසුගිය 2024 වසරට සාපේක්ෂව 2025 වසරේදී සංචාරක පැමිණීම සියයට 15 කින් පමණ වර්ධනය වී තිබෙනවා. ලෝකයේ අනෙකුත් රටවලට සාපේක්ෂව අපේ රටේ සංචාරක කර්මාන්තයේ කැපී පෙනෙන වර්ධනයක් අත්කර ගෙන තිබෙනවා. පසුගිය 2025 වසරේදී සංචාරක ව්යාපාරයෙන් සමස්තයක් ලෙස ඇමෙරිකානු ඩොලර් බිලියන 3.2ක පමණ ආදායමක් උපයා ගැනීමට ශ්රී ලංකාවට හැකිව තිබෙනවා. හෝටල් ආශ්රිත ඉදිකිරීම්, ගුවන් තොටුපළ පුළුල් කිරීම, සංචාරක ව්යාපාරයේ මාර්ගෝපදේශකයන් පුහුණු කිරීම, යටිතල පහසුකම් සංවර්ධනය කිරීම මෙන්ම සංචාරක ක්ෂේත්රය සඳහා නව ආයෝජන ගෙන්වා ගැනීම පසුගිය වසරේදී සිදුව තිබෙනවා. එවැන්නක ප්රතිඵල ලෙස මෙරට සංචාරක ව්යාපාරයේ කැපී පෙනෙන වර්ධනයක් ඇතිව තිබෙනවා. ඒ වගේම විදෙස් රටවල සේවය කරන, ජීවත්වන ලාංකිකයන් නව රජය සම්බන්ධයෙන් විශ්වාසය තබා මුදල් ප්රේෂණය කර තිබෙනවා. මැදපෙරදිග, ඔස්ට්රේලියාව, ජපානය, කොරියාව, ඊශ්රායලය, අමෙරිකාව, එක්සත් රාජධානිය ඇතුළු රටවල සේවය කරන ලාංකිකයන් විශාල ප්රමාණයක් අපේ රටට මුදල් එවා තිබෙනවා. ඒ අනුව මෙරට ඉතිහාසය තුළ වැඩිම විදෙස් ප්රේෂණ අගය වන ඇමෙරිකානු ඩොලර් බිලියන 7.8ක අගය පසුගිය 2025 වසරේ දී වාර්තා වී තිබෙනවා. මීට පෙර වැඩිම විදෙස් ප්රේෂණ අගය වන ඩොලර් බිලියන 7.14ක අගය වාර්තා කර තිබුණේ පසුගිය 2016 වසරේදී. එම අගය අභිභවා පසුගිය 2025 වසරේදී ඩොලර් බිලියන 7.8ක විදෙස් ප්රේෂණ ශ්රී ලංකාවට ලැබී තිබෙනවා. එය විශාල ජයග්රහණයක් වෙනවා. ඒ වෙනුවෙන් දායක වූ සැමට අපගේ ගෞරවය පිරිනමනවා.”
සංචාරක නියෝජ්ය ඇමැති මහාචාර්ය රුවන් රණසිංහ මහතා,
“අද වනවිට මෙරට සංචාරක කර්මාන්තය කොරෝනා වසංගතයට පෙර පැවැති තත්වයට පැමිණ තිබෙනවා. පසුගිය 2025 වසරේදී 531,000ක සංචාරකයින් ඉන්දියාවෙන් පැමිණ තිබෙනවා. විදෙස් රටවල් 7 ක සංචාරකයින් ලක්ෂයට වැඩි ප්රමාණයක් පැමිණ තිබෙනවා. පෝලන්තය, ඔස්ට්රේලියාව, එක්සත් ජනපදය වැනි රටවල් සංචාරක කර්මාන්තයේ නැඟී එන රටවල් ලෙස හඳුනාගෙන තිබෙනවා. එක්සත් රාජධානිය, ජර්මනිය, ඔස්ට්රේලියාව, ප්රංශය ඇතුළු රටවලින් විදෙස් සංචාරකයන් ලක්ෂයට වැඩි ප්රමාණයක් පසුගිය 2025 වසරේදී පැමිණ තිබෙනවා. මේ ඉලක්ක තවදුරටත් ඉදිරියට ගෙන යන්න බලාපොරොත්තු වෙනවා.”
මහින්ද අලුත්ගෙදර
