මත්ද්රව්ය හෝ වෙනත් වැරදිවලට සම්බන්ධ පොලිස් නිලධාරීන් 500 දෙනකු පමණ මේ වන විට හසුවී ඇතැයි පොලිස්පති නීතිඥ ප්රියන්ත වීරසූරිය මහතා සඳහන් කරයි. එම නිලධාරීන් සම්බන්ධයෙන් විනය පියවර ගෙන ඇති අතර, ඒ සම්බන්ධයෙන් තහවුරු කරගැනීමෙන් පසුව සේවයෙන් ඉවත් කිරීමට පියවර ගෙන ඇති බවද පොලිස්පතිවරයා පවසයි. තඹුත්තේගම, පහළගම පිහිටි ශ්රී ලංකා පොලිස් විද්යාලයේ පෙරේදා (04) පැවති ආධුනික පොලිස් කොස්තාපල්වරු සහ රියදුරන් විසිරයෑමේ උත්සවය අමතමින් පොලිස්පතිවරයා මේ බව සඳහන් කළේය. “පොලිස්පති ලෙස මම ආධුනික නිලධාරීන්ගෙන් ඉතා අවංක හා කාර්යක්ෂම සේවාවක් බලාපොරොත්තු වෙනවා.
අද දින ඔබ විසිර යාමෙන් පසුව යොමු වන්නේ පොලීසියේ සාමාන්ය ක්ෂේත්රයේ රාජකාරිවලට හෝ පොලිස්ථානවලට. එහිදී යම් යම් උප සංස්කෘතීන් තිබෙනවා. ඒ උප සංස්කෘතීන් තුළ විවිධ දූෂිත ක්රියා අක්රමිකතා එමෙන්ම ඉතාමත් හොඳ අපරාධ විසඳීම් දැඩි කැපවීමෙන් රාජකාරී කරන නිලධාරීන්, මත්ද්රව්ය හසුකරගන්නා නිලධාරීන් මෙන්ම මත්ද්රව්යවලට ඇබ්බැහි වූ නිලධාරීන් ඉන්නවා” යැයිද පොලිස්පතිවරයා සඳහන් කළේය.
“කිසිම අවස්ථාවක දූෂිත හෝ අක්රමිකතාවලට යොමු නොවී ඉතා වෙහෙස මහන්සි වී දැඩි කැපවීමකින් යුතුව රාජකාරි කරන නිලධාරීන් පිරිසක් ශ්රී ලංකා පොලීසියේ සිටිනවා. ඔබ විසින් අනුගමනය කළ යුත්තේ මෙම උප සංස්කෘතියේ ඉතා හොඳින් හා කැපවීමෙන් යුතු පිරිසයි.
ක්ෂේත්ර රාජකාරීයේ දී මා විසින් සිදුකළ අධ්යයනයකදී පොලිස් නිලධාරීන්ගේ වෘත්තීය ජීවිතය විනාශ කරගන්නා ප්රධාන කරුණු කිහිපයක් හඳුනාගනු ලැබුවා.
මුදල්වලට හෝ අල්ලසට හෝ දූෂණයට යොමුවීම, බීමත්කම හෝ මත්ද්රව්ය භාවිතය, අනිසි හැසිරීම, ජංගම දුරකතනයට ඇබ්බැහි වීම, මාර්ගගත සූදූව මේවා පොලීසියේ පමණක් නොව අනෙකුත් ක්ෂේත්රවලට ද පොදුවේ බලපා ඇති තත්වයක් පෙනෙන්නට තියනවා” යැයිද පොලිස්පතිවරයා පැවසීය.
මහජන ආරක්ෂක හා පාර්ලිමේන්තු කටයුතු පිළිබඳ අමාත්ය ආනන්ද විජේපාල මහතාගේ ප්රධානත්වයෙන් සහ එම අමාත්යාංශයේ ලේකම් විශ්රාමික ජ්යෙෂ්ඨ නියෝජ්ය පොලිස්පති රවී සෙනවිරත්න මහතාගේ සහ පොලීසියේ ජ්යෙෂ්ඨ නිලධාරීන් රැසකගේ සහභාගිත්වයෙන් මෙම විසිරයාමේ උත්සවය පැවැත්විණි.
ආධුනික පොලිස් කොස්තාපල්වරු 241 දෙෙනක් සහ ආධුනික පොලිස් කොස්තාපල් රියදුරන් 74 දෙනෙක් මෙහිදී විසිර ගියේය.
පාරින්ද්යා ගුණදාස
