‘දිට්වා’ සුළි කුණාටුව හෙට (30) දිනය වන විට ඉන්දියාවේ තමිල්නාඩු වෙරළ තීරයට ගමන් කරනු ඇතැයි අපේක්ෂා කරන බව කාර්යයේ නියුතු කාලගුණ විද්‍යාඥ සචින්තා ජයසේකර මහත්මිය පවසයි.
ඇය සඳහන් කර සිටියේ අද උදෑසන වනවිට ත්‍රිකුණාමලයේ සිට කිලෝමීටර් අසූවක් පමණ වයඹ දෙසින් කේන්ද්‍රගතව පැවති සුළි කුණාටුව මේ වන විට උතුරට බරව වයඹ දෙසට ගමන් කරමින් දිවයිනෙන් ඉවතට ගමන් කළ බවය.
සුළි කුණාටුව බැහැරට යාම සමඟ මෙරට වැසි තත්වය සම්පූර්ණයෙන්ම පහව නොගියත් යම් තරමකට අඩුවන බව ද ඇය වැඩිදුරටත් සඳහන් කළාය.
එමෙන්ම සචින්තා ජයසේකර මහත්මිය පැවසුවේ මෙම සුළි කුණාටුවේ බලපෑම අනුව අද දිනයේදී උතුර, උතුරු මැද, වයඹ සහ මධ්‍යම පළාත්වලට විටින් විට වැසි බලාපොරොත්තු විය හැකි බවය.
කෙසේ වෙතත් තිස් වෙනිදායින් පසුව දිවයින පුරාම පවතින වැසි තත්වයේ අඩු වීමක් බලාපොරොත්තු විය හැකි බවත් එහිදී දිවයිනට ඇති සෘජු බලපෑම සම්පූර්ණයෙන්ම ඉවත් වීමක් අපේක්ෂා කරන බවත් ඇය සඳහන් කළාය.
