මෙරටට බලපා ඇති අයහපත් කාලගුණ තත්ත්වය හේතුවෙන් විපතට පත් වී සිටින ජනතාව වෙනුවෙන් ඉන්දීය රජය විසින් ආධාර පිරිනමා තිබෙනවා.
ඒ අනුව, ඉන්දියානු රජය විසින් පිරිනැමූ සනීපාරක්ශක ද්‍රව්‍ය ඇතුළු අත්‍යවශ්‍ය ද්‍රව්‍ය තොගයක් රැගත් ඉන්දීය ගුවන් හමුදාවට අයත් C-130 ගුවන් යානයක් අද (29) අලුයම කටුනායක ජාත්‍යන්තර ගුවන්තොටුපලට පැමිණී බවයි සඳහන් වන්නේ.
මෙම ආධාර භාරදීමේ අවස්ථාවට ඉන්දියානු මහ කොමසාරිස් කාර්යාලයේ Maitrey Kulkarni හා ලුතිනන් කර්නල් Mandeep Singh Negi ඇතුළු ඉන්දිය ගුවන් හමුදා නිලධාරීන් පිරිසක් සහභාගි වූ අතර, ශ්‍රී ලංකා ගුවන් හමුදා මාණ්ඩලික ප්‍රධානී එයාර් වයිස් මාර්ෂල් ලසිත සුමනවීර ඇතුළු ගුවන් හමුදා නිලධාරීන් පිරිසක් මෙරට නියෝජනය කරමින් එම අවස්ථාවට එක්වූ බවයි වැඩිදුරටත් සඳහන් වන්නේ.
ඉන්දීය සහනාධාර රැගත් තවත් ගුවන් යානයක් අද (29) පෙරවරුවේ මෙරටට ළඟා වීමට නියමිත බව රජයේ ප්‍රවෘත්ති දෙපාර්තමේන්තුව සඳහන් කරනවා.
