අද (29) උදෑසන 6.30 වන විට දිවයින පුරා ප්‍රධාන ගංගාවල ජල මට්ටම සහ වර්ෂාපතන තත්ත්වය පිළිබඳ වාරිමාර්ග දෙපාර්තමේන්තුව විසින් නිවේදනයක් නිකුත් කර තිබෙනවා.
ඒ අනුව, බොහෝ දුර‍ට වර්ෂා තත්ත්වය අඩු වී ඇති බවත්, ගංගාවල ඉහළ ගොස් ඇති ජල මට්ටම් පහළ බසිනු ඇතැයි අපේක්ෂා කරන බවයි පැවසෙන්නේ.
කෙසේ වෙතත්, කැළණි ගඟ ආශ්‍රිත නාගලගම් වීදිය මාපකයට අනුව, එහි ජල මට්ටම අධි ගංවතුර තත්ත්වයට තරමක් ආසන්නව, ස්ථාවරව මට්ටමක පවතින බවත්, දැනට සුළු ගංවතුර තත්ත්වයක් දක්වන බවයි සඳහන් වන්නේ.
කැළණි ගඟ හංවැල්ල ප්‍රදේශයෙන් ජල මට්ටම ඉහළ නගිමින් ඇති අතර, අධී ගංවතුර තත්ත්වයක් දක්වා සිටිනවා.
කළු ගඟට අයත් කුඩා ගඟ මිල්ලකන්ද ප්‍රදේශයෙන් ජල මට්ටම ඉහළ යමින් තිබෙන අතර, අධි ගංවතුර මට්ටමට ආසන්නව පවතිනවා.
නිල්වලා ගඟ තල්ගහගොඩ ප්‍රදේශයෙන් ජල මට්ටම සුළු ගංවතුර තත්ත්වයකට ආසන්නයේ පැවතියත්, මේ වන විට ජල මට්ටම තරමක් පහළ බසිමින් ඇති අතර, විමසිලිමත් වන ලෙස දන්වා සිටිනවා.
මැණීක් ගඟ කතරගම ප්‍රදේශයෙන් ජල මට්ටම පහළ බසිමින් පැවතියත්, අධී ගංවතුර තත්ත්වයක් පවතිනවා.
යාන් ඔය හොරොව්පොතාන ප්‍රදේශයෙන් ජල මට්ටම ඉහළ යමින් ඇති අතර, සුළු ගංවතුර තත්ත්වයක් ඇති වී තිබෙනවා.
එසේම මහ ඔය ගිරිඋල්ල ප්‍රදේශයෙන් ජල මට්ටම ඉහළ නගිමින් පවතින අතර, අධි ගංවතුර මට්ටමක් දක්වා එම මට්ටම ඉහළ ගොස් තිබෙනවා.
අත්තනගලු ඔය ද, දූනමලේ ප්‍රදේශයෙන් අධී ගංවතුර මට්ටමේ පවතින බවයි වැඩිදුරටත් සඳහන් වන්නේ.
