ප්‍රසිද්ධ වෙළඳ ලකුණක් අනුකරණය කළ ව්‍යාජ ලේබලයක් යටතේ ජල ජලපොම්ප නිෂ්පාදනය ,බෙදා හැරීම හා අලෙවිය සිදුකළේ යැයි කියන රත්නපුරයේ වෙළෙඳ ආයතනයකට එරෙහිව බුද්ධිමය දේපල පනත යටතේ පැවරූ නඩුව සමථයකට පත් කිරීමට කොළඹ වාණිජ මහාධිකරණ විනිසුරු එම් අයි එම් ඉර්සඩින් මහතා නියෝග කළේය .
මැක් “MAC” වෙළඳ ලකුණට සමාන ව්‍යාජ ලේබලයක් භාවිතා නොකරන බවට රත්නපුරයේ පිහිටි වගඋත්තරකාර සමාගම අධිකරණය ඉදිරියේ ප්‍රකාශ කිරීමෙන් පසුව දෙපාර්ශවය අතර ඇතිකර ගත් එකගතාවය ප්‍රකාරව නඩුව සමථයකට පත් කිරීමට මහාධිකරණ විනිසුරුවරයා වැඩිදුරටත් නියෝග කර ඇත.
කොළඹ 11, මෑන්ස් ලංකා පුද්ගලික සමාගම (Mans Lanka (Pvt)Ltd)විසින් රත්නපුර ලංකා ඉන්ෆ්‍රා සොලුෂන්ස් පුද්ගලික සමාගම,(Lanka Infra Solutions Limited),ධන ලක්ෂ්මී ස්ටෝර්ස් හා සමාගමේ අධ්‍යක්ෂකවරුන් වගඋත්තරකරුවන් කරමින් පැවරූ බුද්ධිමය දේපල නඩුව මෙසේ සමථයකට පත් කෙරිණි.
පැමිණිලිකාර මෑන්ස් ලංකා පුද්ගලික සමාගම සුදත් පෙරේරා ඇසෝසියේට්ස් නීතිඥ සමාගම මගින් මෙම නඩුව පවරා තිබිණි.
පැමිණිල්ල වෙනුවෙන් සුදත් පෙරේරා නීතිඥ සමාගම කරුණු දක්වමින් කියා සිටියේ චීනයේ වි. බි. ඩබ්ලිව් ට්‍රේඩින් පුද්ගලික සමාගම මගින්
(VBW Trading (Pvt) Limited) මෙම (MAC) “මැක්” ගිල්වියහැකි(submersible pump) ජලපොම්ප ආනයනය කිරීමේ එකම බලලත් ආයතනය පැමිණිලිකාර මෑන්ස් ලංකා පුද්ගලික සමාගම බවය. රත්නපුරයේ පිහිටි වග උත්තරකාර සමාගම පැමිණිලිකාර සමාගමේ “MAC” සලකුණ සහිත ජලයේ ගිල්වන පොම්පයයේ වෙළඳ ලකුණට සමාන ව්‍යාජ අනුකරන වෙළඳ සලකුණක් භාවිතා කරමින් ජල පොම්ප අලෙවි කර ,අනීතික සහ අසාධාරණ තරගයක නිරත වන බවද පැවසීය. 2013 වසරේ සිට MAC වෙළඳ ලකුණ භාවිතා කරන පැමිණිලිකාර සමාගම සමාජයේ ඉදිරියේ විශාල කීර්තියක් උසුලන බවද,
පැමිණිලිකාර සමාගමේ මෙම කීර්ති නාමය, ප්‍රසිද්ධිය හා ජනතා විශ්වාසය අවභාවිතා කරමින් ,මැක් වෙළඳ ලකුණට සමාන ව්‍යාජ වෙළඳ සලකුණක් භාවිතා කර රත්නපුර පතල් කර්මාන්තය ආශ්‍රිත පාරිභෝගිකයින්ට ව්‍යාජ වෙළඳ ලකුණ සහිත භාණ්ඩ අලෙවි කරමින් වගඋත්තරකාර සමාගම ලාභ ලබන බවද පැවසීය.
වග උත්තරකාර සමාගම හෝ එහි නියෝජිතයින් විසින් ව්‍යාජ වෙළෙඳ ලකුණු භාවිතා කරමින් ජල පොම්ප නිෂ්පාදනය , බෙදාහැරීම හා අලෙවිය තහනම් කරන ලෙසද ඉල්ලා සිටියේය.
වග උත්තරකාර සමාගම වෙනුවෙන් කේ. එච්. පි. ධනුෂිකා පියදර්ශනී නීතිඥවරිය පෙනී සිටියාය. වගඋත්තරකරුවන් වෙනුවෙන් කියා සිටියේ පැමිණිලිකාර සමාගමේ “MAC”වෙළඳ ලකුණ යටතේ භාණ්ඩ නිෂ්පාදනය අලෙවිය හෝ බෙදා හැරීම මින් ඉදිරියට සිදු නොකරන බවය. අදාල වෙළඳ ලකුණ යටතේ භාණ්ඩ අලෙවි කරන්නේ නම් ඊට අදාල අනුමැතිය හා නිත්‍යනුකූල අවසරය කොළඹ 11, මෑන්ස් ලංකා පුද්ගලික සමාගම මගින් ලබා ගැනීමට අධිකරණය හමුවේ එකඟත්වය පළකරන බවද සඳහන් කළේය.දෙපාර්ශවයේ එකඟතාවයන් හා සමථ කොන්දේසී සලකා බැලූ මහාධිකරණ විනිසුරුවරයා තවදුරටත් “MAC” විළඳ නාමයට සමාන ව්‍යාජ වෙළඳ ලකුණ භාවිතා නොකිරීමට වග උත්තරකරුවන් විසින් අධිකරණය ඉදිරියේ එකඟත්වය පළ කිරීම යන කරුණු සලකා බලා නඩුව සමථයකට පත් කිරීමට නියෝග කළේය.
