පොලිස්පතිවරයාගේ ප්‍රකාශය නිසා ජගත් විතාන මහතාගේ පුරවැසි වරප්‍රසාද සේම මන්ත්‍රී වරප්‍රසාදත් උල්ලංඝනය වී ඇතැයි විපක්ෂ නායක සජිත් ප්‍රේමදාස මහතා පැවසීය. විශේෂ ප්‍රකාශයක් කරමින් විපක්ෂ නායකවරයා මේ බව ඊයේ (28) කියා සිටියේය. වර්තමානයේ පොලීසියේ සමහර ක්‍රියාකාරකම් දැඩි දේශපාලනීකරණයකට ලක්ව ඇති බවත් සමහර විමර්ශන දේශපාලන හා මාධ්‍ය සංදර්ශන බවට පත් කර ඇති බවත් පොලිස්පතිවරයා ආණ්ඩුවේ ප්‍රචාරක යන්ත්‍රණයේ පාර්ශ්වකරුවකු වී ඇති බවට පාර්ලිමේන්තු මන්ත්‍රී ජගත් විතාන මහතා සම්බන්ධයෙන් සිදු කළ අදහස්වලින් පැහැදිලි වන බවත් විපක්ෂ නායකවරයා පැවසීය.
මහජන නියෝජිතයකු ලෙස ජගත් විතාන මහතාට පාර්ලිමේන්තුව තුළ සහ ඉන් පිටත තම සේවාව ඉටුකිරීම මේ ප්‍රකාශ නිසා දැඩි අභියෝගයට ලක්ව ඇති බවත් ජගත් විතාන මහතාගේ පුරවැසි වරප්‍රසාද, පාර්ලිමේන්තු මන්ත්‍රීවරයකු ලෙස වරප්‍රසාද පොලිස්පතිවරයාගේ වැරදි ප්‍රකාශ නිසා උල්ලංඝනය වී ඇති බවත් විපක්ෂ නායක සජිත් ප්‍රේමදාස මහතා පැවසීය. මේ අවස්ථාවේ ජීවිත තර්ජන ඇති ජගත් විතාන මහතා එම තර්ජන සම්බන්ධයෙන් පැමිණිලිකරු ලෙස කටයුතු කිරීමේදී අපරාධකරුවකු ලෙස හැඳින්වීම තරයේ ප්‍රතික්ෂේප කර හෙළා දකින බවත් ආරක්ෂාව ලබා දීම දේශපාලනීකරණය වී ද නැත්නම් ආරක්ෂාව ලබා දීමේ භාරධුර වගකීම දේශපාලනඥයන් සියතට ගෙන ඇත් ද කියා ප්‍රශ්න කරන බවත් ජගත් විතාන මහතාගේ ආරක්ෂාව ගැන දැඩි අවධානයෙන් සිටින බවත් රජය, පොලිස්පතිවරයා ප්‍රමුඛ නීතිය හා සාමය ආරක්ෂා කිරීමේ ඇමැතිවරයා ප්‍රමුඛ සියලු දෙනා ජගත් විතාන මහතාගේ ආරක්ෂාව තහවුරු කර ජීවිතය සුරක්ෂා කළ යුතු බවත් විපක්ෂ නායකවරයා පැවසීය.
රක්ෂණ ශ්‍රියන්ත
