පසුගිය කාලයේදී ව්‍යාපෘති ණය ලෙස රටට ලබාගත් අමෙරිකානු ඩොලර් බිලියන 8ක මුදලකින් ඩොලර් බිලියන 6ක මුදලකට සිදු වූ දෙයක් නොමැති බවත් ඒ මුදල් කවුරුන් හෝ අත්පත් කරගෙන තිබෙන බවත් මහජන ආරක්ෂක හා පාර්ලිමේන්තු කටයුතු ඇමැති ආනන්ද විජේපාල මහතා ප්‍රකාශ කළේය. අපරාධයකින් උත්පාදිත දේ විමර්ශන කොට්ඨාසය විවෘත කිරීමේ අවස්ථාවට ඊයේ (20) එක් වෙමින් ඒ මහතා මේ බව පැවසුවේය. ව්‍යාපෘති ණය ලෙස අමෙරිකානු ඩොලර් බිලියන 8ක් ලබාගෙන තිබුණ ද වත්කම් ලෙස තිබුණේ, අමෙරිකානු ඩොලර් බිලියන 2කටත් අඩු මුදලක් බව විගණකාධිපති වාර්තාවක සඳහන්ව තිබූ බව ඒ මහතා කීය. ඉතිරි ඩොලර් බිලියන 6ට සිදු වූ දෙය නොදන්නා නමුත් අපරාධයකින් උත්පාදිත දේ පිළිබඳ පනතින් ඒ සියල්ල යළි අත්පත් කරගැනීමට හැකියාව ඇති බවත් ඇමැතිවරයා කීවේය. මහ බැංකු බැඳුම්කර සිද්ධිය වැනි වංචා නිසා ඇතැම් අයට මූල්‍ය ප්‍රතිලාභ හිමිව තිබෙන බව ද මේ පනත යටතේ ඒ සම්බන්ධයෙන් ද විමර්ශන කාර්යක්ෂම වනු ඇති බව ද හෙතෙම ප්‍රකාශ කළේය. එමෙන්ම යමකු නීති විරෝධිව මුදල් උපයා යම් යම් දේපොළ හෝ වෙනත් දෑ අත්පත් කරගැනීමට උත්සාහ දරන්නේ නම්, ඒවා මැඬපැවැත්වීමට ද මෙම පනත මඟින් හැකියාව ලැබෙන බව ද ඒ මහතා කිවේය. මෙය ඉතා සුවිශේෂි පනතක් වෙනවා. මෙමඟින් නීතිය කඩිනමින් ක්‍රියාත්මක කිරීමට හැකියාව ලැබෙනවා. මේ රටට දැන් අලුත් පනත් නැතත් මේ පනත මඟින් සංවිධානාත්මක අපරාධත්, මත්ද්‍රව්‍යයත් යම් ප්‍රමාණයකින් මැඬ පවත්වන්නට හැකියාව ලැබෙනවා.
යම් අයෙක් නීති විරෝධීව මුදල් උපයනවා නම් හෝ ඒ මුදල් මඟින් තවත් බොහෝ දෑ උපයා ගැනීමට කටයුතු කරන්නේ නම්, ඒ උත්සාහ ව්‍යාර්ථ කීරීමට මේ පනත මඟින් හැකියාව ලැබෙන බව ද හෙතෙම මෙහිදී පැවසුවේය.
රන්මලී සෝමසිරි
