අග්‍රාමාත්‍ය ආචාර්ය හරිනි අමරසූරිය අද (16) නවදිල්ලියේදී ඉන්දීය විදේශ කටයුතු අමාත්‍ය ආචාර්ය එස්. ජයශංකර් හමුවී තිබේ.
මෙම හමුවේදී දෙපාර්ශ්වය අතර සහයෝගීතාව ශක්තිමත් කිරීම පිළිබඳව සාකච්ඡා කර ඇත.
මේ පිළිබඳව අදහස් දක්වමින් සිය ‘X’ ගිණුමේ සටහනක් තබා ඇති ඉන්දීය විදේශ අමාත්‍යවරයා පවසා ඇත්තේ ශ්‍රී ලංකා අගමැතිනි හරිනි අමරසූරිය නවදිල්ලියේදී හමුවීමට ලැබීම සතුටට කරුණක් බවය.
“ඉන්දියාව ශ්‍රී ලංකාවට අඛණ්ඩව සහයෝගය දැක්වීම සහ අධ්‍යාපනය සහ ධාරිතා වර්ධනය සඳහා අපගේ සහයෝගීතාව ශක්තිමත් කිරීම පිළිබඳව සාකච්ඡා කළා,” යනුවෙන් ද ඔහු සිය ‘X’ සටහනෙන් වැඩිදුරටත් පැවසීය.
අගමැතිනි හරිනි අමරසූරිය ඔක්තෝබර් 18 වන දින දක්වා ඉන්දියාවේ රැඳී සිටින අතර, එම කාලය තුළ ඇය ඉන්දීය අගමැති නරේන්ද්‍ර මෝදි ඇතුළු ඉහළ මට්ටමේ රාජ්‍ය තාන්ත්‍රික නියෝජිතයින් කිහිපදෙනෙකු හමුවීමට නියමිතය.
එමෙන්ම ඇය හෙට පැවැත්වීමට නියමිත NDTV ලෝක සමුළුවේදී “අවිනිශ්චිත කාලවලදී මෙහෙයවීමේ වෙනසක්” යන මාතෘකාව යටතේ ප්‍රධාන දේශනය පැවැත්වීමට ද නියමිත බව වාර්තා වේ.
තවද, අධ්‍යාපන අමාත්‍යවරයා ද වන අගමැති අමරසූරිය, අධ්‍යාපන හා තාක්ෂණ ක්ෂේත්‍රවල සහයෝගීතාවයේ මාර්ග ගවේෂණය කිරීම සඳහා දිල්ලි ඉන්දියානු තාක්ෂණ ආයතනය (IIT) සහ NITI Aayog වෙත ද යාමට නියමිතය.
