සතොස වෙළෙඳනාමය යටතේ කහ, ලුණු සහ සීනි වෙළෙඳපොළට නිකුත් කිරීමට ජාතික සමුපකාර තොග වෙළෙඳ සංස්ථාව තීරණය කර ඇතැයි එහි සභාපති කෝසල විල්බාව මහතා ‘දිනමිණ‘ට ඊයේ (07) පැවැසීය. මේ වන විට කහ සහ ලුණු ඇසුරුම් කිරීම අරඹා ඇති අතර ජාතික සමුපකාර තොග වෙළෙඳ සංස්ථාවට සීනි මිලදී ගැනීමේ සාකච්ඡා සිදුවෙමින් පවතින බව ද ඒ මහතා කීවේය.
ඒ අනුව ඉතා කඩිනමින් ලංකා සතොස වෙළෙඳසල් හරහා සතොස වෙළෙඳ නාමය යටතේ මෙම පාරිභෝගික භාණ්ඩ වෙළෙඳපොළට නිකුත් කිරීමට සැකසුම් සකස් වන වෙමින් පවතින බව ද ඒ මහතා කීවේය.
පාරිභෝගික භාණ්ඩ වෙළෙඳපොළ තුළ සුලභ කිරීමත්, එම භාණ්ඩ අවම මිලක් යටතේ පාරිභෝගික ජනතාවට ලබාදීමත් යන රජයේ අරමුණ සාක්ෂාත් කර ගැනීමේ අදහස පෙරදැරිව මෙම වැඩපිළිවෙළ ක්‍රියාත්මක කරන බව ද ඒ මහතා වැඩිදුරටත් පැවැසීය.
රන්මලී සෝමසිරි
