වෛද්‍යවරුන්ගේ ස්ථානමාරු ක්‍රියාවලිය නිසි ක්‍රමවේදයෙන් යුතුව ක්‍රියාත්මක කරන ලෙස ඉල්ලා අම්පාර දිස්ත්‍රික්ක‍යේ ආරම්භ කර ඇති වෛද්‍ය වැඩ වර්ජනය ලබන සතියේ සිට නැගෙනහිර පළාත තුළම සියලුම රෝහල් වෙත ව්‍යාප්ත කිරීමට කටයුතු කරන බව රජයේ වෛද්‍ය නිලධාරින්ගේ සංගමය සඳහන් කරනවා.
වැඩවර්ජනයට හේතු වූ දෙහිඅත්තකණ්ඩිය රෝහලේ වෛද්‍යවරුන් දෙදෙනාගේ ස්ථාන මාරු ක්‍රියාවලිය නිසි ක්‍රමවේදයෙන් පරිභාහිරව ක්‍රියාත්මක කර ඇතැයි කියන සිද්ධිය සම්බන්ධයෙන් වහාම පරික්ෂණයක් පවත්වා වාර්තාවක් ලබා දෙන ලෙස සෞඛ්‍ය ලේකම්වරයා විසින් පසුගිය 02 වනදා සිව්පුද්ගල කමිටුවක් පත්කර තිබුණා.
නමුත් අදාළ කමිටු වාර්තාව මෙතක් සෞඛ්‍ය ලේකම්වරයා වෙත ලබා දීමට කටයුතු කර නොමැති බව සංගමයේ ලේකම් වෛද්‍ය ප්‍රභාත් සුගතදාස සඳහන් කරනවා.
ඉතා සුළු ප්‍රශ්නයක් හෝ විසදා ගැනීමට සෞඛ්‍ය අමාත්‍යංශයට නොහැකි වී ඇත්තේ වෛද්‍යවරුන්ගේ ස්ථානමාරු වැඩපිලිවෙල පිටුපස දේශපාලන හස්තයක් ක්‍රියාත්මක වන නිසාද යන්න සැකයක් මතුවන බව ද ලේකම්වරයා සඳහන් කළා.
නැගෙනහිර පළාතේ සියලුම රෝහල් ඉදිරිපිට ලබන අගහරුවාදා උද්ඝෝෂණයන් පවත්වා අනතුරුව විධායක සභාව රැස්ව ඉදිරි ක්‍රියාමාර්ගයන් එදිනම තීරණය කරන බව ව්‍යෛ සුගතදාස පැවසුවා.
අම්පාර දිස්ත්‍රික්කය පුරා රෝහල්වල ක්‍රියාත්මක වැඩවර්ජනය හේතුවෙන් රෝගීහු මහත් අපහසුවක පත්ව ඇති බවත් මාස ගණනාවක් බලා සිට සැත්කම් සදහා දින ලබා දුන් රෝගීන් මහත් දුෂකරතාවන්ට මෙන්ම ජීවිත අවදානම්වලට ද ලක්ව ඇති බව රෝහල් ආරංචි මාර්ග සඳහන් කරනවා.
