මෙරට ඉංජිනේරුවරුන්ගේ තාක්ෂණික දායකත්වයෙන් නිර්මාණය වූ තෙවැනි නැනෝ චන්ද්‍රිකාව හෙට (19) කක්ෂගත කිරීමට නියමිත බව මොරටුව ආතර් සී ක්ලාක් ආයතනය සඳහන් කර තිබේ.
‘බර්ඩ්ස් – එක්ස් ඩ්‍රැගන්ෆලයි’ ලෙස නම්කර ඇති මෙම චන්ද්‍රිකාව පසුගිය අගෝස්තු 24 වනදා නාසා ආයතනය විසින් දියත් කළ එස්.පී.එක්ස් – 33 රොකට් මෙහෙයුම ඔස්සේ ජාත්‍යන්තර අභ්‍යවකාශ ආයතනය වෙත රැගෙන ගොස් තිබේ.
2019 වසරේදී මෙරට පළමු නැනෝ චන්ද්‍රිකාව ලෙස ‘රාවණ් – 1’ චන්ද්‍රිකාවත් 2022 වසරේදී ජාත්‍යන්තර පාර්ශවයන් 5ක සහභාගීත්වයෙන් යුක්ත වූ තාක්ෂණික සහයෝගීතා ව්‍යාපෘතියක් මඟින් නිර්මාණය කළ ‘කිට්සුනේ’ චන්ද්‍රිකාවත් මීට පෙර කක්ෂගත කර තිබුණි.
ඒ අනුව බර්ඩ්ස් – එක්ස් ඩ්‍රැගන්ෆලයි නැනෝ චන්ද්‍රිකාව හෙට (19) පස්වරු 2.15ට ජාත්‍යන්තර අභ්‍යවකාශ මධ්‍යස්ථානයේ සිට එහි කක්ෂය වෙත මුදා හැරීමට නියමිත වේ.
