ශ්‍රී ලංකා අග්‍රාමාත්‍ය ආචාර්ය හරිනි අමරසූරිය ඔක්තෝබර් මැද භාගයේ ඉන්දියාවේ සිදු කිරීමට නියමිත සංචාරයේදී ඇයට ගෞරව ආචාර්ය උපාධියක් පිරිනැමීමට දිල්ලි විශ්වවිද්‍යාලය (DU) සූදානම් වන බව නිල ලේඛන සමාලෝචනය කරමින් ද ඉන්දියන් එක්ස්ප්‍රස් වාර්තා කර තිබේ.
ඇය හින්දු විද්‍යාලයේ ආදි ශිෂ්‍යාවකි.
ඉන්දීය විදේශ කටයුතු අමාත්‍යංශයේ ලිපියක් සළකා බැලීම සඳහා දිල්ලි විශ්වවිද්‍යාලයේ රෙජිස්ට්‍රාර්වරයා විසින් සැප්තැම්බර් 8 වැනිදා නිකුත් කරන ලද නිවේදනයකින් ලබන බ්‍රහස්පතින්දා අධ්‍යයන කවුන්සිලයේ රැස්වීමක් කැඳවා ඇත.
හින්දු විද්‍යාලය සමඟ සම්බන්ධීකරණයෙන් දිල්ලි විශ්වවිද්‍යාලයේ විශේෂ උපාධි ප්‍රදානෝත්සවයක් සංවිධාන කරන ලෙස එම ලිපියෙන් ඉල්ලා සිටි බව ද ඉන්දියන් එක්ස්ප්‍රස් පුවත්පතේ සදහන් වේ.
රැස්වීමේ න්‍යාය පත්‍රය වන්නේ ආචාර්ය අමරසූරියගේ සංචාරය අතරතුර ‘විශ්වවිද්‍යාලයේ ප්‍රඥප්තිවල 16 වැනි ප්‍රඥප්තියේ විධිවිධාන යටතේ’ ඇයට ගෞරව ආචාර්ය උපාධියක් පිරිනැමීමට සැලසුම් කිරීමයි.
“… අගමැතිනියගේ ඉදිරි ඉන්දීය සංචාරය… 2025 ඔක්තෝබර් 17-18 දිනවල ඉන්දියාවේ සිදුවනු ඇතැයි අපේක්ෂා කෙරේ,” යනුවෙන් අධ්‍යාපන අමාත්‍යාංශය වෙත යොමු කරන ලද විදේශ කටයුතු අමාත්‍යාංශයේ ලිපියක සඳහන් වේ.
ආචාර්ය අමරසූරිය දිල්ලි නුවර සමඟ ඇති අධ්‍යයන සබඳතා ඉස්මතු කරන මෙම ලිපිය, ඇය 1991 සහ 1994 අතර කාලය තුළ විදේශ කටයුතු අමාත්‍යාංශයේ අනුග්‍රහය ලත් ශිෂ්‍යත්වයක් මත හින්දු විද්‍යාලයෙන් සමාජ විද්‍යාව පිළිබඳ උපාධිය සම්පූර්ණ කළ බව සඳහන් කරයි.
විශේෂ උපාධි ප්‍රදානෝත්සවය සම්බන්ධයෙන් විශ්වවිද්‍යාලයට සහ විද්‍යාලයට නිල සන්නිවේදනයක් ලැබී ඇති බව හින්දු විද්‍යාලයේ විදුහල්පති අංජු ශ්‍රීවාස්තවා ප්‍රකාශ කළ බව පුවත්පත උපුටා දක්වා තිබේ.
ඔක්තෝබර් මැද භාගයේදී ගෞරව ආචාර්ය උපාධිය පිරිනැමීමට සැලසුම් කර ඇති බව ශ්‍රීවාස්තවා වැඩිදුරටත් පැවසීය.
අග්‍රාමාත්‍ය කාර්යාලය දැනටමත් උපදෙස් ලබාගෙන ඇති බවත් උත්සවය සඳහා අනුමැතිය ලබා දී ඇති බවත් ලේඛනවල සඳහන් වේ.
යෝජිත උත්සවය සඳහා කෙටි විස්තරයක් ලබා දෙන ලෙස විදේශ කටයුතු අමාත්‍යාංශය දිල්ලි විශ්වවිද්‍යාලයෙන් ඉල්ලා ඇත.
