සියලු දුර ගමන් බස් රථ ගමන් ඇරඹීමට පෙර මූලික තත්ත්ව පරීක්ෂණයක් සිදුකිරීම අනිවාර්ය කිරීමට රජය සැළසුම් කර තිබේ.
ඒ අනුව, ලබන මස මුල සිට එය ආරම්භ කිරීමට කටයුතු යොදා ඇති බව වාර්තා වෙයි.
මූලික අදියර තුළ කොළඹ බැස්ටියන් මාවත සහ මාකුඹුර බහුවිධ ප්‍රවාහන මධ්‍යස්ථානය කේන්ද්‍ර කර ගනිමින් ජාතික ගමනාගමන කොමිසමේ අධික්ෂණය යටතේ එය ක්‍රියාත්මක කිරීමට සැලසුම් කර තිබේ.
ඊට අමතරව දුර ගමන් විනෝද චාරිකා බස් රථද මෙම තත්ත්ව පරීක්ෂණය සිදු කිරීම අනිවාර්ය කෙරෙන අතර, එම තත්ත්ව පරීක්ෂණයෙන් තොරව කිසිදු දුර ගමන් විශේෂචාරිකාවක් සඳහා අනුමැතිය හිමිනොවනු ඇති බව වාර්තා වෙයි.
කිලෝමීටර 100ට වැඩි දුරක් ගමන් ගන්නා බස් රථ ධාවනය ආරම්භයට පැය 48කට පෙර යෝග්‍යතා සහතිකයක් ලබාගැනීම මෙහිදි සිදුකළ යුතුය.
මෝටර් රථ ප්‍රවාහන දෙපාර්තමේන්තුව මේ සඳහා අවශ්‍ය උපදේශයන් චක්‍රලේඛයක් මගින් නිකුත් කිරීමට කටයුතු මේ වනවිට සිදුකරන බව සඳහන්ය.
මෙම ක්‍රියාවලිය දිවයින පුරා ව්‍යාප්ත කිරීමේදී රථවාහන අලුත් වැඩියාවන් සිදුකරනු ලබන ස්ථාන මෝටර් රථ ප්‍රවාහන දෙපාර්තමේන්තුව මගින් පරික්ෂා කර ඔවුන්ට අදාළ පරික්ෂාවන් සිදුකර යෝග්‍යතා සහතිකයක් නිකුත් කිරීමේ බලය ලබාදීමට කටයුතු කරනු ලබයි.
ඒ අනුව මෙම ක්‍රියාවලිය දිවයින පුරා සිදුකිරීමට පියවර ගෙන ඇති බව වාර්තා වෙයි.
