කුඩු ජාවාරම සහ පාතාලය මර්දනය කිරීමට නාමල් රාජපක්ෂ මන්ත්‍රීවරයා හා පොහොට්ටුව සැබෑවටම කටයුතු කරන්නේ නම් වහාම කළ යුතුව ඇත්තේ මිද්දෙණියේ අයිස් කන්ටේනර් සිද්ධියට චෝදනා එල්ල වී ඇති එම එම පක්ෂයේ සාමාජික සම්පත් මනම්පේරි වහාම පොලීසියට භාරදීම බව අමාත්‍ය නලින්ද ජයතිස්ස මහතා පැවසීය. මෙම සිද්ධිය සම්බන්ධයෙන් තවමත් පරීක්ෂණ ආරම්භ වූවා පමණක් බවත් එම විමර්ශනවලට අදාළව පොලීසිය විසින් ඉදිරි කටයුතු සිදු කරනු ඇති බවත් අමාත්‍යවරයා එහිදී සඳහන් කළේය. චෝදනා එල්ල වූ වහාම ඔහුගේ පක්ෂ සාමාජිකත්වය අහෝසි කිරීම පමණක් ප්‍රමාණවත් නොවන බවත් මීට පෙර ඔහුට එල්ල වී ඇති චෝදනා පිළිබඳව නාමල් රාජපක්ෂ මන්ත්‍රීවරයා නොදැන සිටීම පුදුමයට කරුණක් බවත් ඇමැතිවරයා සඳහන් කළේය.
එමෙන්ම මීට පෙර පොහොට්ටුවේ සාමාජිකත්වය දැරූ දේශපාලනඥයන් දූෂණ චෝදනාවලට ලක්ව බන්ධනාගාර ගතව සිටියදීත් ඔවුනගේ පක්ෂ සමාජිකත්වය අහෝසි කර නොමැති බවද අමාත්‍යවරයා පෙන්වා දුන්නේය.
ඊයේ (09) පැවැති කැබිනට් මාධ්‍ය හමුවේදී මාධ්‍යවේදියකු නැඟූ ප්‍රශ්නයකට පිළිතුරු දෙමින් ඒ මහතා මේ බව කීවේය.
නුවන් කොඩිකාර, මුදිතා දයානන්ද
