හිටපු ජනාධිපති ගෝඨාභය රාජපක්ෂ සිය විදෙස් සංචාරය නිමකර මෙරටට පැමිණි පසු ඔහුගෙන් ප්‍රකාශයක් ලබාගැනීමට නියමිතව ඇතැයි අපරාධ පරීක්ෂණ දෙපාර්තමේන්තුව පවසනවා.
ගාලුමුවදොර පිටියේ පැවති අරගල භූමියට පොලිසිය විසින් ඉකුත් 2022 මැයි 09 වෙනිදා එල්ලකල ප්‍රහාරය සම්බන්ධයෙන් එම ප්‍රකාශය ලබාගැනීමට නියමිත බව ද අපරාධ පරීක්ෂණ දෙපාර්තමේන්තු ආරංචි මාර්ග සඳහන් කරනවා.
අරගල භූමියට එල්ලවූ ප්‍රහාරය වැලැක්වීමට පියවර නොගත් බවට චෝදනා එල්ලකරමින් අපරාධ පරීක්ෂණ දෙපාර්තමේන්තුව එවකට බස්නාහිර පළාත් භාර ජ්‍යෙෂ්ඨ නියෝජ්‍ය පොලිස්පති ලෙස කටයුතු කළ හිටපු පොලිස්පති දේශබන්දු තෙන්නකෝන් අත්අඩංගුවට ගෙන තිබුණා. පසුව ඒ සම්බන්ධයෙන් රක්ෂිත බන්ධනාගාරගත කර සිටි ඔහු මේ වන විට සිටින්නේ ඇප මතයි.
අරගල භූමියට එල්ලවූ ප්‍රහාරය වැලැක්වීමට නිසි නියෝග තමන්ට නොලැබුණු බව දේශබන්දු තෙන්නකොන්ගේ පාර්ශවයෙන් මේ සම්බන්ධයෙන් ප්‍රකාශ කර තිබුණා.
එවකට සිටි පොලිස්පති චන්දන වික්‍රමරත්න අපරාධ පරීක්ෂණ දෙපාර්තමේන්තුව හමුවේ ප්‍රකාශ ලබාදෙමින් පවසා ඇත්තේ කිසිදු ආකාරයේ පෙළපාලියකට ගාලුමුවදොර ප්‍රදේශයට ඇතුළුවීමට ඉඩ නොදෙන ලෙස දේශබන්දු තෙන්නකෝන්ට තමා උපදෙස් ලබාදී තිබුණු බවයි.
