එක්සත් ජාතීන්ගේ මානව හිමිකම් සැසිවාරයට පෙර අමාත්‍ය විජිත හේරත් මහතා මෙරට සිටින තානාපතිවරු සහ මානව හිමිකම් ක්‍රියාකාරීන් සමඟ සාකච්ඡා කිරීමට සැලසුම් කර තිබේ.
මෙහිදී මේ සම්බන්ධයෙන් උනන්දුවක් දක්වන විද්වතුන් සහ නීතීඥවරුන් ද මුණ ගැසීමට අමාත්‍යවරයා සැලසුම් කර ඇත.
එළැඹෙන සතියේ දී එම සාකච්ඡාව පවත්වනු ඇති බව විදෙස් කටයුතු අමාත්‍යංශ ආරංචි මර්ග සඳහන් කළේය.
එක්සත් ජාතීන්ගේ මානව හිමිකම් කවුන්සිලයේ 60 වැනි සැසිවාරය සැප්තැම්බර් මස 8 වැනිදා පැවැත්වීමට නියමිතව තිබේ.
ඒ අනුව නව රජය බලයට පත්වීමෙන් අනතුරුව වසරක පමණ කාලයක් තුළ මානව හිමිකම් සම්බන්ධ ගැටලු විසදීම සඳහා ගෙන ඇති ක්‍රියාමාර්ග මෙන්ම එහි ප්‍රගතිය පිළිබඳව විදේශ අමාත්‍යවරයා රාජ්‍ය තාන්ත්‍රික නිලධාරීන් දැනුවත් කිරීමට නියමිතය.
යම් හෙයකින් මානව හිමිකම් කවුන්සිලය තුළ ශ්‍රී ලංකාව සම්බන්ධ යෝජනාවකදී ඡන්ද විමසීමක් පැවැත්වුවහොත් ශ්‍රී ලංකාවට අනෙක් රටවල සහාය ලබා ගැනීම සිදු කළ යුතුව පවතී.
මේ අතර පසුගිය ජුනි මාසයේ දී දිවයිනට පැමිණි එක්සත් ජාතීන්ගේ මානව හිමිකම් පිළිබඳ මහ කොමසාරිස්වරයා ” ශ්‍රී ලංකාවේ මානව හිමිකම් තත්ත්වය” සිය වාර්තාව සැසිවාරයේ දී ඉදිරිපත් කිරීමට නියමිතව ඇත.
