එක්සත් ජාතික පක්ෂයේ 79 වැනි සංවත්සරය 06 වැනිදා එක්සත් ජාතික පක්ෂ නායක හිටපු ජනාධිපති රනිල් වික්‍රමසිංහ ඇතුළු දේශපාලන පක්ෂ රැසක නායකයින්ගේ සහභාගිත්වයෙන් කොළඹ ශ්‍රී ලංකා ප්‍රදර්ශන හා සම්මේලන මධ්‍යස්ථානයේදී උදෑසන 9.30ට පැවැත්වීමට තීරණය කළ බව එක්සත් ජාතික පක්ෂයේ සභාපති වජිර අබේවර්ධන ප්‍රකාශ කරනවා.
ඔහු කියා සිටින්නේ මේ සඳහා සියලුම දේශපාලන පක්ෂවල නායකයන්ට ආරාධනා කරන බවයි.
විශේෂයෙන්ම ව්‍යවස්ථාපිත ඒකාධිපතිවාදය පරාජය කිරීම යන තේමාව සඳහා ආණ්ඩුවට එරෙහිව පසුගිය දිනවල පෙළගැසුණු සියලුම දේශපාලන පක්ෂවල නායකයින්ද මෙම අවස්ථාවට එක්වීමට නියමිත බව ද වජිර අබේවර්ධන සඳහන් කරනවා.
වර්තමාන දේශපාලන තත්ත්වය ,රට හමුවේ ඇති අභියෝග සහ එක්සත් ජාතික පක්ෂය ඇතුලු විපක්ෂයේ වර්තමානයේ වගකීම සහ ඉදිරි ගමන් මඟ පිළිබඳව එක්සත් ජාතික පක්ෂ නායක රනිල් වික්‍රමසිංහ විසින් එදින විශේෂ ප්‍රකාශයක් රට හමුවේදී සිදුකිරීමට නියමිත බවද වජිර අබේවර්ධන සඳහන් කරනවා.
දේශපාලන පක්ෂ රැසක නායකයින් මෙම සංවත්සරයට සහභාගි වන නිසා එක්සත් ජාතික පක්ෂ මූලස්ථානය වන සිරිකොතෙන් පිට ස්ථානයක මෙම සමුළුව පැවැත්වීමට තීරණය කළ බවද හෙතෙම සඳහන් කළා.
අද එක්සත් ජාතික පක්ෂයේ ජ්‍යෙෂ්ඨයින්ගේ සහභාගීත්වයෙන් පැවැති සාකච්ඡාවකදී මෙම තීරණ ගත් බවද වජිර අබේවර්ධන වැඩිදුරටත් සඳහන් කළා.
