ඉන්දුනීසියානු රජයට එරෙහිව ඊයේ පැවැති විරෝධතාවයක් ප්‍රචණ්ඩ මුහුණුවරක් ගෙන තිබූ බව විදෙස් මාධ්‍ය වාර්තා කරයි.
පෙරේදා පැවැති විරෝධතාවයක් අතරතුර පොලිස් වාහනයක ගැටී පුද්ගලයෙකු මිය යාමට එරෙහිව ඊයේ මෙම විරෝධතා පවත්වා තිබේ.
ඉන්දුනීසියාව තුළ දේශපාලන සහ ආර්ථික ප්‍රතිසංස්කරණ සිදුකරන ලෙස එරට රජයට බලකරමින් ජකර්තා අගනුවරදී විරෝධතා මාලාවක් පැවැත්වුණේ පසුගිය බ්‍රහස්පතින්දාය.
එම විරෝධතාකරුවන් විසිරුවා හැරීමට කැරලි මර්දන පොලිසිය කටයුතු කරමින් සිටින අතරතුර පොලිස් වාහනයක ගැටී යතුරුපැදිකරුවෙකු මියගොස් තිබුණි.
එම සිදුවීමට විරෝධය පල කරමින් ඊයේ එරට බන්ඩුන්ග් නගරයේදී විරෝධතා පැවැති අතර එම විරෝධතා ප්‍රචණ්ඩ මුහුණුවරක් ගෙන තිබේ.
විරෝධතාකරුවන් ගොඩනැගිලි ගිනි තබමින් සහ දේපළවලට හානි කරමින් විරෝධය පළකර ඇත.
රට තුළ පොලිස් ප්‍රතිසංස්කරණ සිදුකරන ලෙස ද ඔවුන් එහිදි රජයට බලකර තිබේ.
මෙම විරෝධතා හේතුවෙන් අග්නිදිග ආසියාවේ විශාලතම ආර්ථිකය ලෙස සැලකෙන ඉන්දුනීසියාව පිළිබඳව ආයෝජකයින්ගේ විශ්වාසය ද පහත වැටී ඇති බව වාර්තා වෙයි.
