2025 වසරේ මුල් මාස හත තුළ ශ්‍රී ලංකාවේ අපනයන අංශය කැපීපෙනෙන සාධනීය මට්ටමක් සහ ස්ථාවර ප්‍රගතියක් පෙන්නුම් කරමින් ඩොලර් බිලියන 10කට ආසන්න අගයක් ගෙන ඇති බව අපනයන සංවර්ධන මණ්ඩලය පෙන්වා දෙයි.
ඒ අනුව මුළු අපනයන ආදායම ඇමරිකානු ඩොලර් මිලියන 9992.53 කි. එය 2024 එම කාලයට සාපේක්ෂව 7.79%ක වර්ධනයකි.
2025 ජූලි මාසයේ දී වෙළඳ භාණ්ඩ සහ සේවා යන අංශයන්හි මුළු අපනයන ආදායම අ‍ෙමරිකානු ඩොලර් මිලියන 1641.11කි. මෙය 2024 ජූලි මාසයට සාපේක්ෂව 12.68%ක වාර්ෂික වර්ධනයකි. ශ්‍රී ලංකාවේ අපනයන අංශයේ ශක්තිය සහ වෙ‍ෙළඳපොළ ප්‍රවේශය පුළුල් කිරීමටත්, ගෝලීය තරගකාරිත්වය වැඩිදියුණු කිරීමටත් ගත් උපායමාර්ගික උත්සාහයන්ගේ ධනාත්මක බලපෑම මෙයින් පිළිබිඹු කරයි.
මෙම වර්ධනය ගෝලීය වෙළඳාමට ශ්‍රී ලංකාව වැඩි වශයෙන් ඒකාබද්ධ වීමත්, වෙළඳපොළ අවස්ථා විවිධාංගීකරණය කරමින් අපනයන තරගකාරිත්වය ශක්තිමත් කිරීමටත් දරන අඛණ්ඩ උත්සාහයේ සාර්ථකත්වය ඉස්මතු කරන බව අපනයන සංවර්ධන මණ්ඩලයේ (EDB) සභාපති මංගල විජේසිංහ මහතා සඳහන් කළේය.
ජූලි මාසයේ දී අපනයන ආදායම අ‍ෙමරිකානු ඩොලර් බිලියන 1.6 ඉක්මවා ගොස් පළමු මාස හත තුළ අ‍ෙමරිකානු ඩොලර් බිලියන 10 කට ආසන්න වී ඇති අතර 2025 ජූලි මාසයේ දී පමණක්, වෙ‍ෙළඳ භාණ්ඩ අපනයනය වාර්ෂිකව 15.37% කින් වර්ධනය වී අ‍ෙමරිකානු ඩොලර් මිලියන 1,304.0ක් දක්වා ළඟා වී ඇත. ශ්‍රී ලංකා රේගුවේ තාවකාලික දත්තවලට අනුව, එම සංඛ්‍යාවට මැණික් හා ස්වර්ණාභරණ සහ ඛනිජ තෙල් නිෂ්පාදන සඳහා වූ ඇස්තමේන්තුගත ආදායම ද ඇතුළත් වේ. 2025 ජනවාරි සිට ජූලි දක්වා කාලය තුළ වෙළඳ භාණ්ඩ අපනයනය ඇමරිකානු ඩොලර් මිලියන 7, 799.82 කි. එය 2024 එම කාලයට සාපේක්ෂව 7.22%ක වැඩිවීමකි.
සේවා අපනයනය සමස්ත අපනයන වර්ධනයට ප්‍රධාන ශක්තියක් වී ඇත. ජූලි මාසයේ දී සේවා අපනයන ආදායම අ‍ෙමරිකානු ඩොලර් මිලියන 337.11කි. වසරේ මුල් මාස හත තුළ සේවා අපනයනය 9.86%කින් වර්ධනය වී ඇත. එය අ‍ෙමරිකානු ඩොලර් මිලියන 2192.71කි. මෙම ප්‍රවණතාව ශ්‍රී ලංකාවේ දැනුම පදනම් කරගත් ආර්ථිකය වර්ධනය වීමේ වැදගත්කම පිළිබිඹු කරයි.
නෙරංජලා වික්‍රමසිංහ
