ඩොනල්ඩ් ට්‍රම්ප්ගේ තීරුබදු ප්‍රතිපත්තියෙන් අමෙරිකාව සහ චීනය අතර උද්ගත වූ වෙළෙඳ අර්බුදයට විසඳුම් සෙවීම සඳහා දෙරටේ නියෝජිතයන් අතර ලන්ඩන් නුවර පැවැති දෙවැනි වටයේ සාකච්ඡාවලදී දෙපාර්ශ්වයම එකඟතාවකට පැමිණි බව අමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කර ඇතැයි විදෙස් මාධ්‍ය වාර්තා කරයි.
අමෙරිකානු සමාගම්වලට චුම්බක සහ දුර්ලභ ලෝහ වර්ග ඇතුළු නිෂ්පාදන සැපයීමට චීනය එකඟතාවට පැමිණි බවත්, චීන සිසුන්ට පනවනු ලැබූ වීසා සීමාවන් ඉවත් කිරීමට අමෙරිකාව එකඟ වූ බවත් ජනාධිපතිවරයා සඳහන් කළ බව විදෙස් මාධ්‍ය වැඩිදුරටත් වාර්තා කරයි. එම එකඟතාවන් සම්බන්ධව චීන ජනාධිපති ෂී ජින්පින් සමඟ එක්ව ඉදිරියේදී අවසන් අනුමැතිය ලබාදෙන බවත් ඩොනල්ඩ් ට්‍රම්ප් ප්‍රකාශ කළ බව විදෙස් මාධ්‍ය සඳහන් කරයි. එම සාකච්ඡාව පවත්වා ඇත්තේ අමෙරිකාව විසින් පනවනු ලැබූ ඉහළ තීරුබදු චිනයේ කර්මාන්ත රැසකට බලපෑම් එල්ල වී ඇති අවස්ථාවකදී බවත්, තීරුබදු ප්‍රතිපත්තිය මත චීනයේ ප්‍රාන්ත රැසක නිෂ්පාදන දැඩි පසුබෑමකට ලක්වී තිබූ බවත් වාර්තා වේ. පසුගිය මාසයේදී චීනයේ විවිධ ප්‍රාන්තවල කර්මාන්තශාලා රැසක් වසා දමා එහි සේවකයන්ට තාවකාලික නිවාඩු ලබාදීමට පියවරගෙන තිබූ බවද විදෙස් මාධ්‍ය සඳහන් කරයි.
