නැඟෙනහිර චීනයේ ෂැංඩොං ප්‍රාන්තයේ පිහිටි රසායනික කම්හලක සිදුවූ දැවැන්ත පිපිරීමකින් පුද්ගලයන් පස්දෙනකු ජීවිතක්ෂයට පත්වී ඇති අතර, තවත් පුද්ගලයන් 6 දෙනකු අතුරුදන්වී ඇතැයි විදෙස් මාධ්‍ය වාර්තා කරයි. පිපිරීමත් සමඟ එහි තිබූ රසායනික ද්‍රව්‍ය ඒ අවට පිහිටි නිවාසවලට විසිරී ගොස් ඇති අතර, පිපිරීමේ කම්පනයෙන් නිවාසවල වීදුරු කවුළු බිඳී ගොස් ඇතැයි ද වාර්තා වේ. කිලෝමීටරයකට ආසන්න දුරක් කම්පනයට ලක් කළ රසායනික කම්හලේ පිපිරීමෙන් පුද්ගලයන් 19 දෙනකු තුවාල ලබා රෝහල්ගත කර ඇතැයි ද විදෙස් මාධ්‍ය වැඩිදුරටත් වාර්තා කරයි. එම පිපිරීම සම්බන්ධව පරීක්ෂණයක් සිදු කිරීමට ෂැංඩොං ප්‍රාන්ත බලධාරින් තීරණය කර ඇති අතර, වායුගෝලයේ තත්ත්වය පරීක්ෂණයක් සිදු කිරීමට ද නියමිත බවද වාර්තා වේ. රසායනික කම්හල්වල පිපිරීම් චීනයේ සුලබ සිදුවීමක් වන අතර, 2015 වසරේ ටියැන්ජින් ප්‍රාන්තයේ සිදුවූ එවැනි පිපිරීමකින් පුද්ගලයන් 170 දෙනකු ජීවිතක්ෂයට පත්වී තවත් පුද්ගලයන් 700කට පමණ තුවාල සිදුවී තිබිණි.
